ქუთაისში კიკვიძის სკვერის რეაბილიტაცია მიმდინარეობს. ტენდერის მიხედვით, სკვერის აღდგენითი სამუშაოებისათვის 290 ათასი ლარის გამოყოფა იყო ნავარაუდევი. თუმცა, კომპანიამ, რომელმაც ტენდერი მოიგო, სამუშაოები 275 ათას ლარად უნდა შეასრულოს. კეთილმოწყობასთან ერთად სკვერში დაიდგმება ახალი შადრევანიც. ჯერჯერობით, ადგილზე დარჩება თავად რევოლუციონერი „კიკვიძეც“. თუმცა ქალაქის საზოგადოება აქტიურად განიხილავს ძეგლის ამ ადგილიდან აღების საკითხს. როგორც ქალაქის მერმა, ნუგზარ შამუგიამ განაცხადა, ძეგლი განახლებულ სკვერშიც იმავე ადგილზე დარჩება, ხოლო მისი აღების საკითხი თავად მოსახლეობამ უნდა გადაწყვიტოს.

სკვერის განახლება 25 დეკემბრისათვის იგეგმება, საახალწლოდ ქალაქის ხელისუფლება განახლებული სკვერის გახსნას საზეიმოდ გეგმავს.