საქართველოს მთავრობა პროფესიული განვითარებისათვის ევროკავშირისგან ოთხი წლის განმავლობაში 27 მილიონ ევროს ოდენობით ტექნიკურ და საბიუჯეტო დახმარებას მიიღებს.

ახლადშემუშავებული პროგრამის საფუძველზე, აღნიშნული თანხა საქართველოს ბიუჯეტში პოფესიული განათლების შრომის ბაზართან დაახლოებისა და კურსდამთავრებულთა დასაქმების მაჩვენებლის გაზრდის მიზნით გადმოირიცხება.

„განათლებისა და მეცნიერების სამინისტროს ევროკავშირთან მიმართებაში ბევრი შეუსრულებელი ვალდებულება დახვდა, რის გამოც ბიუჯეტი მილიონ ევროზე მეტს კარგავდა, რადგან ეს თანხა გარკვეული ვალდებულებების შესრულების სანაცვლოდ უნდა მიეღო საქართველოს. ჩვენ მოვითხოვეთ დამატებითი პერიოდი, რომლის ფარგლებში ყველა მოთხოვნა დავაკმაყოფილეთ, შევასრულეთ ვალდებულებები და წელს ამ თანხის მიღებას საფრთხე აღარ ემუქრება, ეს თანხები ბიუჯეტში წამოვა, რაც თანამედროვე და პროფესიული განათლების ჩამოყალიბებაში დაგვეხმარება,“ - განაცხადა განათლების მინისტრმა თამარ სანიკიძემ.

მინისტრის თქმით, კერძო და საჯარო კოლეჯების ხარისხი თანაბარი უნდა იყოს და მათი დაფინანსების მექანიზმი სამომავლოდ განიხილება.