„სამართლიანმა არჩევნების“  მიერ წინასაარჩევნო პერიოდის მონიტორინგის შუალედურ ანგარიშში საუბარია ვანსა და ხარაგაულში პოლიტიკური  ზეწოლისა და მუქარის ფაქტებზე.

„პარტია „პაატა ბურჭულაძე-სახელმწიფო ხალხისათვის“ განცხადებით, ვანის მუნიციპალიტეტის თანამშრომელს, რომელიც პარტია „პაატა ბურჭულაძე–სახელმწიფო ხალხისათვის“ მხარდამჭერია, სოსო ჩიტორელიძეს პარტია „ქართული ოცნების ოფისში“ სიტყვიერი და ფიზიკური შეურაცხყოფა მიაყენეს. პარტიის განცხადებით „ქართული ოცნების“ ოფისში იმყოფებოდნენ ვანის მუნიციპალიტეტის გამგებელი ზაზა ხურციძე, მისი მოადგილე ლაშა გიორგაძე, საკრებულოს თავმჯდომარე ალექსანდრე ლილუაშვილი და ამავე პარტიის მაჟორიტარი დეპუტატობის კანდიდატი ვანისა და ხონის ოლქში გრიგოლ ლილუაშვილი.

„პაატა ბურჭულაძე–სახელმწიფო ხალხისათვის“ ვანის თავმჯდომარემ კობა ძაგნიძემ „სამართლიანი არჩევნების“ დამკვირვებელს განუცხადა, რომ სოსო ჩიტორელიძე პარტია „ქართული ოცნების“ ოფისში ვანში მომხდარი სტიქიურ უბედურების საკითხთან დაკავშირებით დაიბარეს, თუმცა პარტიის ლიდერებმა მასზე ზეწოლა მისი შვილის - ბესო ჩიტორელიძის გამო მოახდინეს, რომელიც პარტია „პაატა ბურჭულაძე–სახელმწიფო ხალხისათვის“ წარმომადგენელია ვანის მუნიციპალიტეტის საოლქო საარჩევნო კომისიაში.

ვანის მუნიციპალიტეტის გამგებლის მოადგილე, ლაშა გიორგაძე „სამართლიანი არჩევნების“ დამკვირვებელთან საუბარში აღნიშნულ ფაქტს უარყოფს. მისი თქმით, 23 ივლისს, შაბათს, პარტია „ქართული ოცნების“ ოფისში შეხვედრა მართლაც გაიმართა და მათი პარტიის მაჟორიტარი დეპუტატობის კანდიდატს, გრიგოლ ლილუაშვილს გაცნობითი ხასიათის შეხვედრა ჰქონდა ვანის მუნიციპალიტეტის თანამშრომლებთან, რომლებიც ამავდროულად პ/გ „ქართული ოცნების“ მხარდამჭერები არიან. ლაშა გიორგაძემ აღნიშნა, რომ სოსო ჩოტორელიძე შეხვედრაზე მართლაც იმყოფებოდა, თუმცა მის მიმართ არანაირ სიტყვიერ ან ფიზიკურ შეურაცხყოფას ადგილი არ ჰქონია.’’ – ნათქვამია განცხადებაში.

ანგარიშში აღნიშნულია ხარაგაულის მუნიციპალიტეტის საკრებულოს რესპუბლიკელი თავმჯდომარის ინგა მაღრაძის თანამდებობიდან გადაყენების მცდელობაც.

,,ინგა მაღრაძის განცხადებით, მისი იმპიჩმენტის საკითხის განხილვა საკრებულოში მხოლოდ იმიტომ დადგა დღის წესრიგში, რომ იგი რესპუბლიკური პარტიის წევრია, და ამ საკითხის წამოჭრა დაკავშირებულია მოახლოებულ საპარლამენტო არჩევნებთან.

საკრებულოს წევრის, ვარლამ ჭიპაშვილის განცხადებით, იმპიჩმენტის საკითხის განხილვის მიზეზი გახლდათ საკრებულოს წევრებს შორის შეუთანხმებლობა რიგ საკითხებზე.

აღნიშნულის მიზეზი კი წევრთა პარტიულობას უკავშირდება, რადგან მათი ნაწილი პარტია „ქართული ოცნების“ წევრია, ხოლო ნაწილი „რესპუბლიკური პარტიის“.

აღსანიშნავია, რომ 27 ივლისის სხდომაზე საკითხის განხილვისას ინგა მაღრაძის თანამდებობიდან გადასაყენებლად საკმარისი ხმების რაოდენობა ვერ მოგროვდა.

ადმინსიტრაციული რესურსის გამოყენების ფაქტზე საუბრობს სამართლიანი არჩევნები ტყიბულში, მინი ფეხბურთის ფინალურ მატჩის  რომელიც ტყიბულის  მუნიციპალიტეტის  ახალგაზრდობის საქმეთა სამსახურის მიერ იყო ორგანიზებული,  დასრულების შემდეგმუნიციპალიტეტის გამგეობის წარმომადგენლებმა გამარჯვებულებს მიულოცეს და გადასცეს საჩუქრები. დეპუტატობის კანდიდატმაც მიულოცა გამარჯვებულებს და სიტყვით მიმართა, რაც აგიტაციის ნიშნებს შეიცავდა.

ადმინისტრაციული რესურსის გამოყენების ფაქტია გამოვლენილი თერჯოლაშიც.

„2016 წლის 18 ივლისს, თერჯოლის მუნიციპალიტეტის გამგებელი, თეიმურაზ ჯაფარიძე „ქართული ოცნების“ მიერ ორგანიზებულ შეხვედრაზე თერჯოლის მუნიციპალიტეტის გამგეობის ბიუჯეტზე რიცხული სატრანსპორტო საშუალებით გამოცხადდა (Mitsubishi Pajero, სანომრე ნიშნით TE-041-RJ). ავტომანქანა, თერჯოლაში, „ქართული ოცნება-დემოკრატიული“ საქართველოს რაიონულ ოფისთან იდგა.

შეხვედრაზე შეკრებილი იყვნენ პოლიტიკური გაერთიანება „ქართული ოცნების“ წევრები და აქტივისტები, დაახლოებით 700-მდე ადამიანი, ისინი ემზადებოდნენ ქუთაისში წასასვლელად, სადაც მაჟორიტარობის კანდიდატების წარდგენა უნდა მომხდარიყო.

გამგებლის მიერ მუნიციპალიტეტის ბიუჯეტზე რიცხული მანქანის პარტიული მიზნებისთვის გამოყენება წარმოადგენს ადმინისტრაციული რესურსის არამიზნობრივად გამოყენებას.” – ნათქვამია ანგარიშში.

ადმინისტრაციული რესურსის გამოყენების ფაქტად მიაჩნიათ ასევე,  ქუთაისში,  18 ივლისს, გიორგი კვირიკაშვილის მიერ იმერეთის მუნიციპალიტეტების მაჟორიტარი დეპუტატების წარდგენის დღეს გამოვლენილი დარღვევები. კერძოდ, „სამართლიანი არჩევნების“ინფორმაციით, აღნიშნული შეხვედრისთვის ქუთაისის საჯარო სკოლებიდან და ბაღებიდან პედაგოგების მობილიზება მოხდა. ქუთაისის მე-5 ბაღის ერთ-ერთი პედაგოგის განცხადებით, ყველა თანამშრომელი დაბარებული იყო მერიაში 6 საათზე, საიდანაც უნდა წაეყვანათ 8 საათზე დაგეგმილ ღონისძიებაზე.

მართა მარგველანი