„ნაციონალური მოძრაობა" ცდილობს, მეორე ტურამდე ქუთაისელი ამომრჩევლის ემოციებზე იმუშაოს და პარლამენტის ქუთაისიდან თბილისში გადმოტანის საკითხზე სიტუაცია დაძაბოს“, - ამის შესახებ „ქართული ოცნების“ წევრის მანანა კობახიძემ განცხადებას სააგენტო „აიპრეს“ ავრცელებს.
მისი თქმით, პარლამენტის თბილისში გადმოტანასთან დაკავშირებით საკონსტიტუციო ცვლილების პროექტი მომზადებულია, თუმცა მე-9 მოწვევის პარლამენტში დღის წესრიგში მისი პირველ საკითხად დაყენება არ იგეგმება.
„ქუთაისისთვის ძალიან მნიშვნელოვანი პროექტები გვაქვს, რომელთა ნაწილიც დაწყებულია, ნაწილი მომავალი ბიუჯეტით არის გათვალისწინებული. საუბარია ტექნოლოგიურ უნივერსიტეტზე, ფართო ინფრასტრუქტურულ პროექტებზე, იგივე სამხრეთ-ჩრდილოეთის დამაკავშირებელ ახალ მაგისტრალზე, თუ რკინიგზის დაკავშირებაზე აეროპორტთან, რაც ახალ დატვირთვას შესძენს ამ ქალაქს. ყველაფერი კეთდება იმისთვის, რომ ქალაქს ჰქონდეს თავისი დანიშნულება, იქ სამუშაო ადგილები შეიქმნას, მოქალაქეებს ჰქონდეთ უკეთესი ცხოვრების პირობები და პარლამენტის ქუთაისში ყოფნით არ განისაზღვრებოდეს იქ ეკონომიკის ზრდა.
ეს საკონსტიტუციო ცვლილების პროექტი მომზადებულია, ხოლო რა ეტაპზე დადგება კენჭისყრაზე, როგორ გადაწყდება ეს საკითხი ამაზე საუბარი ჯერ ნაადრევია. ამაზე უნდა იმსჯელოს მომავალმა უმრავლესობამ“, - აცხადებს მანანა კობახიძე.
ამასთან, კობახიძის თქმით, კონსტიტუციაში ცვლილებები ფართო კონსესუსის საფუძველზე განხორციელდება, ამისთვის შეიქმნება კომისია.
„კომისია, ძალიან ფართო წარმომადგენლობას გულისხმობს, ყველა ოპოზიციურ პარტიას, რომელიც აქტიურია. საუბარია საპარლამენტო, არასაპარლამენტო ოპოზიციაზე, სამოქალაქო სექტორზე, ექსპერტებზე, კონსტიტუციონალისტებზე, აკადემიურ წრეებზე, არასამთვრობო ორგანიზაციებზე, წარმოდგენილი უნდა იყოს პრეზიდენტის ადმინისტრაცია, სასამართლო ხელისუფლება, მთავრობა, პროკურატურა, აუდიტის სამსახური“, - აღნიშნა მანანა კობახიძემ.