უახლოეს ხანში ქუთაისს კიდევ ერთი თანამედროვე ტიპის შადრევანი შეემატება, რომელიც, ადგილობრივი ხელისუფლების ინიციატივით, კიკვიძის ბაღში დამონტაჟდება. კიკვიძის ბაღში არსებული ძველი შადრევნის დემონტაჟი რამდენიმე დღის წინ დასრულდა. ამ ეტაპზე იქ სამუშაოები მიმდინარეობს. ამ დღეებში სამუშაოები ქუთაისის მერმა ნუგზარ შამუგიამ და მერის პირველმა მოადგილემ ზაზა ნუცუბიძემ მოინახულეს. შადრევნის მშენებლობის დასრულებისთანავე სკვერის კეთილმოწყობის სამუშაოები დაიწყება, რომლისთვისაც ბიუჯეტიდან 250 ათასი ლარი გამოიყოფა. სამუშაოების შემსრულებელი ტენდერით გამოვლინდება. ნუგზარ შამუგიას განცხადებით, სექტემბრისთვის განახლებული კიკვიძის ბაღი ახალგაზრდობის საუკეთესო დასასვენებელი ადგილი გახდება.