ქუთაისის მერიაში ტესტირების ბარიერი 53-მა ატესტანტმა ვერ გადალახა, ამის შესახებ განცხადება ქალაქის მერმა შოთა მურღულიამ გააკეთა.
მისი თქმით, მეორე ეტაპზე გადასული 902 ადამიანიდან, ტესტირებაზე მხოლოდ 796 გამოცხადდა. აქედან ტესტირების ეტაპი 401-მა ატესტანტმა წარმატებით გადალახა, 50 ქულა და ზევით 157-მა მონაწილემ მიიღო. ხოლო ბარიერი ვერ გადალახა 53-მა ატესტანტმა.
შოთა მურღულიას განცხადებით, ყველაზე მაღალი კონკურენცია მერიის შემდეგ ვაკანსიებზე დაფიქსირდა: მერიის საბინაო ინფრასტრუქტურის სამსახურის უფროსის მოადგილეზე - ერთ ადგილზე 24 კონკურსანტი, მერიის ინფრასტრუქტურის განვითარების სამსახურის უფროსის მოადგილეზე - ერთ ადგილზე 14 კონკურსანტი და მერიის კულტურის, სპორტის, განათლების, ძეგლთა დაცვისა და ახალგაზრდობის საქმეთა სამსახურის განყოფილების წამყვან სპეციალისტზე - ერთ ადგილზე 15 კონკურსანტი.
კონკურსის მეორე ეტაპი, რომელსაც გასაუბრების სახე ექნება, 25 ნოემბრიდან დაიწყება.