ახალი წელი ერთ-ერთი გამორჩეული დღესასწაულია, რომელსაც დიდი თუ პატარა განსაკუთრებული სიხარულით ელის. ამ დღეს ყველა ცდილობს, დაივიწყოს ყველაფერი ცუდი, მადლიერებით გააცილოს ძველი წელი და იმედით ელოდება ახალი წლის შემობრძანებას.
ასეა ამჯერადაც... მიუხედავად იმისა, რომ გასული 2019 წელი საკმაოდ რთული, მძიმე და ტრაგიკული მოვლენებით სავსე იყო მთელი ქვეყნისთვის, ეს არ გვაძლევს უფლებას, რომ მომავალზე არ ვიზრუნოთ, მომავლის ლამაზი პერსპექტივის გეგმები არ დავსახოთ და განვითარებაზე არ ვიფიქროთ.
სწორედ ამიტომ ახალი 2020 წლის დადგომამ ახალი სიცოცხლე და ახალი მიზნები, ახალი სიკეთეები უნდა მოიტანოს თითოეული ჩვენგანის გულსა და ოჯახებში, სრულიად საქართველოში.
ახალი წლის დახვედრის ტრადიცია სტუმარ-მასპინძლობის ტრადიციასთანაა გაიგივებული, ჩემი აზრით: შეიძლება, სულაც არ გეზეიმებოდეს, გშიოდეს ან გწყუროდეს, მაგრამ ქართველი კაცი სტუმარს მაინც გაუღიმებს და უკანასკნელი კაპიკებით ულამაზეს სუფრასაც გაუშლის. დიახ, ახალ წელს გაღიმებული სახეებით, განათებული ნაძვის ხითა და იმედებით სავსე უნდა შევხვდეთ!
გილოცავთ დამდეგ შობა-ახალ წელს!
ფეხბუდნიერი ყოფილიყოს იგი ჩვენი ქვეყნისთვის!