როგორც ცნობილია, არსებული რისკების მიუხედავად, საქართველოში პირველი ღირსების მარში გაიმართა. ხანგრძლივი კონსულტაციების შემდეგ ასეთი გადაწყვეტილება მიიღეს თბილისი პრაიდის საორგანიზაციო ჯგუფის წევრებმა. ღირსების მარშის ჩატარებას ისინი ლგბტ მხარდამჭერ ჯგუფებთან, ოჯახის წევრებთან, მეგობრებთან, საერთაშორისო ორგანიზაციების, დიპლომატიური კორპუსის წარმომადგენლებთან, ევროკავშირისა და მეზობელი სახელმწიფოების მოქალაქეებთან ერთად აანონსებდნენ და საჯარო მსვლელობაში მონაწილეობისკენ ყველა მხარდამჭერს მოუწოდებდნენ.
იმ უდიდესი რისკის გათვალისწინებით, რაც ამ მოვლენებს 2013 წლის 17 მაისის (ჰომოფობიასთან, ტრანსფობიასა და ბიფობიასთან ბრძოლის საერთაშორისო დღე) აქციიდან დღემდე საერთო ფონად თან სდევს, აქციის დაანონსებამ საზოგადოების ვნებათაღელვა გამოიწვია და მალევე დაანონსდა კონტრ-აქციები, რომლის ორგანიზატორებიც საზოგადოებას ქუჩაში გამოსვლისკენ და ღირსების დაცვისკენ მოუწოდებდნენ, ხოლო ლგბტ ადამიანებს რელიგიური გრძნობების შეურაცხყოფაში და ტრადიციების შელახვაში ღიად ადანაშაულებდნენ. მათი მხრიდან აშკარად გამოხატული სიძულვილის ენა და სიცოცხლის მოსპობის მუქარა ამჯერადაც რეაგირების მიღმა დატოვა ძალოვანმა უწყებებმა .
ღირსების მარშის გამართვის გადაწყვეტილება თბილისი პრაიდის გუნდმა უსაფრთხოების გარანტიების არარსებობის პირობებში მიიღო. კერძოდ, შინაგან საქმეთა სამინისტრომ მათ ჯერ კიდევ 31 მაისს უთხრა, რომ ღონისძიების ჩატარება მათ მიერ დაგეგმილ ადგილებზე და ფორმატით, პროცესში ჩართული ადამიანების უსაფრთხოების რისკების გათვალისწინებით, შეუძლებელი იქნებოდა.
ათასობით ადამიანი პატრულირების პირობებში, რომლებიც აღჭურვილნი იყვნენ სხვადასხვა ბლაგვი საგნით და თოკებით, გამაგრებულნი იყვნენ თბილისის ქუჩებში და აცხადებდნენ, რომ არ დაუშვებდნენ მამათმავლობის პროპაგანდას და თუ საჭირო იქნებოდა, თავისი ძალებით აღკვეთავდნენ ნებისმიერი ადამიანის გადაადგილებას, აქციაში მონაწილეობას ან სხვა მათთვის საწინააღმდეგო აქტივობას.
ღირსების მარში მაინც შედგა, იმის მიუხედავად, რომ ლგბტ მარშის ორგანიზატორების მხრიდან ბოლო წუთამდე გასაიდუმლოებული იყო ლოკაცია და აქციის ფარგლებში დაგეგმილი სხვა აქტივობები .
ჩვენ ორივე მხარის წარმომადგენლებთან ვცადეთ სამომავლო გეგმების დაზუსტება და ინფორმაციისთვის ორგანიზაცია "ქართული ოჯახის და სიწმინდის" დამფუძნებელს, გიორგი გეთიაშვილს დავუკავშირდით:
- ბატონო გიორგი, მოგესალმებით! როგორ შეაფასებთ მიმდინარე მოვლენებს და თუ ფიქრობთ, რომ თქვენი და თქვენი თანამოაზრეების მხრიდან გაწეულმა შრომამ შედეგი გამოიღო?
- პირველ რიგში, მოგესალმებით. ჩვენ არასდროს ჩავატარებინებთ პრაიდს, მაინც არ დავიღლებით არასოდეს, სანამ კაცები არიან საქართველოში, ჩვენ პრაიდს არ ჩავატარებინებთ და არ დავუშვებთ გარყვნილების პროპაგანდას!
რა თქმა უნდა, ვთვლი, რომ ჩვენმა ძალისხმევამ შედეგი გამოიღო და ეს არ ყოფილა მხოლოდ ჩვენი ახირება, ეს არის ქართული საზოგადოების მოთხოვნა, რომ ქუჩაში მსგავსი აქციები არ უნდა ტარდებოდეს!
- ფიქრობთ, რომ თქვენი მხრიდან ძალის გადამეტებას ადგილი არ ჰქონია?
- ჩვენი ქვეყნის ისტორია სისხლით არის დაწერილი და ასე იყო სულ, ჩვენი წინაპრები სიცოცხლეს წირავდნენ იმისთვის, რომ აქამდე მოვსულიყავით, ამიტომ არ ვფიქრობ, რომ ჩვენი მხრიდან ძალის გადამეტებას ჰქონდა ადგილი. ჩვენი გრძნობები არ ილახება? ჩვენ არ ვიჩაგრებით? ოჯახი არის ქალის და კაცის ერთობა და არა - ამ გარყვნილების.
არავინ დაზოგავს თავს, რომ ეს უმსგავსობა აღკვეთოს, თუ საჭირო გახდა, ყველა დაანონსებული აქციის წინ გამოვალთ ქუჩაში და დავაპატიმრებთ ყველა ადამიანს, ვინც საზოგადოების ნების წინააღმდეგ წავა!
- სამომავლოდ თუ გაქვთ სამოქმედო გეგმები?
- დიახ, ჩვენ დავდივართ რეგიონებში და უკვე ასი ათასამდე ხემოწერა გვაქვს, ვითხოვთ გაუქმდეს ანტიდისკრიმინაციული კანონი, რომელსაც ამოფარებულნი არიან ეს გარყვნილები და ამ კანონს იშველიებენ ყველა არგუმენტად!
ასევე ვითხოვთ, პარლამენტმა განიხილოს და მიიღოს "რელიგიური გრძნობების შეურაცხოფის" კანონი. ვფიქრობთ, რომ მხოლოდ ასე შეიძლება კანონით გახდეს დასჯადი ქართული საზოგადოების შეურაცხყოფა!
; ; ;
ჩვენ ასევე დავუკავშირდით ლგბტ თემის უფლებადამცველს და სხვადასხვა აქციების ორგანიზატორს, მარიამ ტალახაძეს, რომელიც ამჟამად ამერიკის შეერთებულ შტატებში ცხოვრობს
-მოგესალმებით, მარიამ! როგორ შეაფასებთ მიმდინარე მოვლენებს, თუ ფიქრობთ, რომ აქცია შედგა და ის მთავარი გზავნილები საზოგადოებამდე მივიდა, რაც ლგბტ-ადამიანებს სურდათ?
- მოგესალმებით, ვფიქრობ, რომ იმ უკიდურესად დაძაბული ფონის და სიცოცხლისთვის საშიში რისკების მიუხედავად, რასაც მუდმივად ვგრძნობთ საზოგადოების მხრიდან, აქცია შედგა და კიდევ ერთხელ შევძელით ხმა მიგვეწვდინა იმ ადამიანებისთვის, ვისგანაც მორალური დახმარება და მხარდაჭერა გვჭირდება!
-იმ გადმოსახედიდან, როდესაც საზოგადოების აგრესიის მსხვერპლი არაერთხელ ყოფილხართ, როგორ ფიქრობთ რამდენად გამართლებული და შედეგის მომტანია მსგავსი აქციების გამართვა და ხომ არ თვლით, რომ რისკი თქვენი სიცოცხლის მოსპობისა, მსგავსი აქციების დაანონსების შემდეგ უფრო იზრდება?
-მიუხედავად იმისა, რომ ჩემი ნების საწინააღმდეგოდ მომიწია ქვეყნის დატოვება, უმძიმესი ფიზიკური და მორალური ტრავმებით, მაინც ვფიქრობ, რომ ამ ბრძოლას შედეგი ექნება !
რა თქმა უნდა, ყოველი მსგავსი აქციის დროს ჩვენ ჩვენს სიცოცხლეს ვდებთ სასწორზე და არ გვაქვს არანაირი გარანტია, რომ სიძულვილის ენით მოლაპარაკე ადამიანების მხრიდან ჩვენი სიცოცხლე დაცული იქნება . მითუმეტეს მაშინ, როცა სამართალ დამცავი ორგანოები არასდროს უზრუნველყოფენ ჩვენი უსაფრთხოების დაცვას, არც - ინდივიდუალურად და არც - ჯგუფური შეკრებების დროს !
ხშირად ვფიქრობ, მითუმეტეს ახლა, როდესაც თავის მორალური და ფიზიკური გადარჩენისთვის ბრძოლა აღარ მიწევს, რომელი უფრო დიდი ტკივილია, ის, რომ ფიზიკურად განადგურებს საზოგადოება და მუდმივად სტრესში ცხოვრობ თუ ის, რომ ყოველდღიურად გრძნობ, რომ არასასურველი და მათთვის მიუღებელი ხარ.
ჩემთვის, ისევე, როგორც ქუჩაში ღირსების და ოჯახის დასაცავად გამოსული ადამიანებისთვის, უმთავრესი სწორედ ღირსება და ოჯახია, თუმცა მათთვის მაინც სიძულვილის ობიექტი ვარ.
- სამომავლო გეგმებზე რას გვეტყვით?
- როგორც ზემოთ მოგახსენეთ, ქვეყნის დატოვება ჩემი ნების საწინააღმდეგოდ და არსებული რეალობის გამო მომიწია, ერთ-ერთი მორიგი ინციდენტის დროს, როდესაც მივიღე ურთულესი ტრავმები .
საქართველოში დავტოვე მეგობრები, ჯგუფი, სადაც გაერთიანებული ვიყავით სამასზე მეტი ადამიანი, იდენტური ისტორიებით და ცხოვრების წესით, ჩვენ ხშირად ვაწყობდით სხვადასხვა აქტივობას და მხოლოდ ერთმანეთთან ვგრძნობდით, რომ ჩვენც შვილები, დედები, დები და ადამიანები ვიყავით.
მინდა, რომ ფინანსურად შევძლო მათი დახმარება და რეაბილიტაცია. თითოეული მათგანის სიცოცხლე და მომავალი ჩემთვის ძალიან მნიშვნელოვანია და ჩემი ოცნებაა, ოდესმე ისეთ ქვეყანაში ვიცხოვროთ, სადაც არავინ მოგვკლავს .
- წარმატებებს გისურვებთ!
- დიდი მადლობა თქვენ, რომ მუდმივად ინარჩუნებთ ობიექტურობას და გვაძლევთ საშუალებას, ადამიანების ჩვენი სათქმელი მივაწვდინოთ!
ნინო გიორგაძე