ქუთაისში, ჯავახიშვილის ქუჩაზე, რომელიც საცხოვრებელი კორპუსებით მჭიდროდ დასახლებული ადგილია, ბენზინგასამართი სადგურის მშენებლობა დაიწყო. ამ პროცესს ბუნებრივია, ადგილობრივი მოსახლეობის პროტესტი მოყვა.
ერთ-ერთმა ადგილობრივმა მცხოვრებმა, დალი ბარაბაძემ ჩვენთან საუბარში აღნიშნა, რომ ეს ტერიტორია, ჯავახიშვილის ქუჩა 2016 წლის თებერვლიდან ქალაქის მეორე ზონაა და კანონით აკრძალულია აირგასამართი, ბენზინგასამართი სადგურის მშენებლობა. ამიტომ მერიას მშენებლობის ნებართვა არ უნდა გაეცა 2016 წლის დეკემბერში. მოსახლეობამ პროტესტის საპასუხოდ მერიისგან მხოლოდ 2008 წლის ბრძანების ამონაწერი მიიღო, სადაც წერია, რომ ჯავახიშვილის ქუჩა მესამე ზონაა... რაც, რბილად რომ ვთქვათ, ტყუილია...
მოსახლეობამ დასახმარებლად თავისი რაიონის (გამარჯვების ოლქის) მაჟორიტარ დეპუტატს საკრებულოში, ქალბატონ ნატო ქათამაძეს მიმართა.
დალი ბარაბაძე ჩვენთან საუბარში აცხადებს: „ აქ არის სიცოცხლისთვის ბრძოლა და ერთადერთი, ვინც გვერდით დაგვიდგა თავიდან და დღემდე ჩვენთანაა, ნატო ქათამაძეა“. მოსახლეობის წერილის საფუძველზე მაჟორიტარმა შეისწავლა მშენებლობის ირვლივ არსებული მასალები, რომელშიც ბევრი შეუსაბამობა აღმოაჩინა, რის გამოც ნატო ქათამაძე მოსახლეობას მშენებლობის შეჩერებასა და სამშენებლო ნებართვის გაუქმებას დაჰპირდა...
მაჟორიტარის თხოვნით საქმეში ჩაერთო ადვოკატი, ბატონი რობიზონ ხურცილავა.
1 მარტს ქუთაისის საქალაქო სასამართლომ წარმოებაში მიიღო სასარჩელო განცხადება ქ.ქუთაისში ჯავახიშვილის ქუჩა N24-ში მდებარე ზურაბ ფილიპიას კუთვნილ მიწის ნაკვეთზე ავტოგასამართი სადგურის, ქ.ქუთაისის მერიის მიერ გაცემული მშენებლობის ნებართვის ბათილად ცნობასთან დაკავშირებით და შესაბამისი განჩინება გამოსცა მშენებლობის შეჩერებაზე, სასამართლოს საბოლოო გადაწყვეტილების მიღებამდე.
ბრძოლის პირველი ეტაპი საზოგადოებისა და მაჟორიტარი დეპუტატის სასარგებლოდ დასრულდა, ახლა სასამართლოს საბოლოო გადაწყვეტილებას უნდა დაველოდოთ.
მეგი კაკაბაძე