საარჩევნო ბლოკმა პაატა ბურჭულაძე-სახელმწიფო ხალხისთვის 8 ოქტომბრის საპარლამენტო არჩევნებამდე ერთი თვით ადრე პროპორციული სიის პირველი 30 კანდიდატის პრეზენტაცია გამართა.
საარჩევნო სიას საოპერო მომღერალი პაატა ბურჭულაძე უძღვება, სიაში შემდეგ მოდიან: დეპუტატი გიორგი ვაშაძე, „ახალი საქართველოს“ დამფუძნებელი, რომელმაც ნაციონალური მოძრაობა 2016 წლის მაისში დატოვა; დავით ჯანდიერი, (სახელმწიფო ხალხისთვის); ვახტანგ მეგრელიშვილი (ახალი პოლიტიკური ცენტრი - გირჩი); ირაკლი ყიფიანი (სახელმწიფო ხალხისთვის); იაგო ხვიჩია (გირჩი); დავით კიზირია (ახალი საქართველო); დეპუტატი გიორგი მელაძე (გირჩი); მელორ ტყეშელაშვილი, 1999 წლის მოწვევის პარლამენტის წევრი; მამუკა კაციტაძე (ახალი მემარჯვენეები); გიორგი პაპავა (სახელმწიფო ხალხისთვის); და მე-12 ნომრად შეყვანილი, დეპუტატი ზურაბ ჯაფარიძე, რომელმაც „გირჩი“ მას შემდეგ დააფუძნა, რაც შარშან ნაციონალური მოძრაობა დატოვა.
პირველ 30 კანდიდატს შორის სულ ორი ქალი კანდიდატი ფიგურირებს - 21-ე ნომრად შეყვანილი ნინო დარსაველიძე "გირჩიდან" და 30-ე ირინა ტურაშვილი.