ცესკოს თავმჯდომარე თამარ ჟვანიამ პარტიების წარმომადგენლებს საარჩევნო ადმინისტრაციის მიერ მომზადებული მაჟორიტარული ოლქების ელექტრონული რუკები გადასცა და 2016 წლის 8 ოქტომბრის პარლამენტის არჩევნებისთვის საარჩევნო ადმინისტრაციაში მიმდინარე საქმიანობების შესახებ ისაუბრა. შეხვედრაზე ასევე განიხილეს საკანონმდებლო საკითხები.

„ეს იყო ძალიან მნიშვნელოვანი შეხვედრა ინფორმაციის გაცვლის თვალსაზრისით. ვისაუბრეთ პოლიტიკური პარტიების და საინიციატივო ჯგუფების რეგისტრაციის პროცესზე, დამკვირვებლების და სხვა მნიშვნელოვანი საარჩევნო საკითხების შესახებ.  რაც ყველაზე მთავარია, ჩვენ, ცენტრალურმა საარჩევნო კომისიამ, ჩვენი ინიციატივით მოვამზადეთ 73-ივე მაჟორიტარული ოლქის ელექტრონული რუკა და გადავეცით თითოეულ პარტიას“,-განუცხადა ჟურნალისტებს თამარ ჟვანიამ შეხვედრის ბოლოს.

სამუშაო შეხვედრას ცესკოს თავმჯდომარე თამარ ჟვანიასთან და კომისიის წევრებთან ერთად 20 პარტიის წარმომადგენელი ესწრებოდა.