ლიდერი სატელეკომუნიკაციო კომპანია „სილქნეტი“ და ”კავკასიის უნივერსიტეტი” საგანმანათლებლო სფეროში თანამშრომლობას  იწყებენ.

მაღალი აკადემიური მოსწრების სტუდენტები პროფესიულ სტაჟირებას ქვეყნის უმსხვილეს სატელეკომუნიკაციო კომპანიაში გაივლიან. ახალგაზრდებს საშუალება მიეცემათ  გაეცნონ და დაეუფლონ სხვადასხვა ტექნოლოგიებს, მათთვის საინტერესო სეგმენტში მოსინჯონ ძალები და პრაქტიკული მეცადინეობების შემდგომ სასურველი მიმართულება აირჩიონ.

მემორანდუმი ძალაში უკვე აპრილიდან შევა. სტუდენტების პროფესიული განვითარების ხელშეწყობის მიზნით, განხორციელდება ერთობლივი პროგრამები. გათვალისწინებულია სილქნეტის სპეციალისტების მიერ საჯარო ლექციების ორგანიზება კავკასიის უნივერსიტეტში.  კომპანია მოტივირებულია შეუწყოს ხელი ახალგაზრდების პროფესიულ ზრდას.

სილქნეტი წლების მანძილზე თანამშრომლობს ასევე საქართველოს ტექნიკურ და ბათუმის უნივერსიტეტებთან.