2 მარტს, ქუთაისის განათლების განვითარების და დასაქმების ცენტრში საკონსულტაციო საბჭოს შეხვედრა გიამართა. საკონსულტაციო საბჭო პროექტის ,,შეზღუდული შესაძლებლობების მოქნე პირთა განათლების და დასაქმების ადვოკატირება და ლობირება’’ ფარგლებში შეიქმნა. საბჭოს შექმნის იდეისთანავე განისაზღვრა, რომ იმ პირებისგან ყოფილიყო დაკომპლექტებული, რომლებსაც ადამიანის უფლებების დაცვის კუთხით მუშაობის გამოცდილება აქვთ.
საბჭო საკმაოდ წარმომადგენლობითია, საკონსულტაციო საბჭოს წევრები არიან: მადონა ბასილაძე – სახალხო დამცველის აპარატის რეგიონული დეპარტამენტის, იმერეთის, რაჭა–ლეჩხუმის, ქვემო სვანეთის სამმართელოს უფროსი; ნატო ქობულაძე – საქართველოს განათლებისა და მეცნიერების სამინისტროს მულტიდისციპლინარული გუნდის წევრი, აკაკი წერეთლის სახელმწიფო უნივერსიტეტის ასოცირებული პროფესორი; ლელა ხურციძე – სოციალური მომსახურების სააგენტოს იმერეთის სამხარეო ცენტრის უფროსის მოადგილე; ქეთი ბერძენიშვილი – რადიო ,,ძველი ქალაქის’’ პროგრამების დირექტორი; გია სანტურიანი – ჩეხური არასამთავრობო ორგანიზაცია ,,ადამიანი გაჭირვებაში’’, ევროკავშირის მიერ დაფინანსებული პროექტის ,,საქართველოში აგრობიზნესის ფორმალური, არაფორმალური და არაოფიციალური პროფესიული განათლების განვითარება’’ კოორდინატორი; თინათინ გელხვიიძე– ექსპერტი შეზღუდული შესაძლებლობების მქონე პირების საკითხებში, უფლებამამცველი; საბჭოს მთავარი ფუნქციაა პროექტის განმახორციელებელ გუნდს გაუწიოს კონსულტაციები და მისცეს რჩევები პროექტის განხორციელების პერიოდში.
2 მარტს, შეხვედრაზე ქუთაისის განათლების განვითარების და დასაქმების ცენტრის დირექტორმა ლიკა კილაძემ საკონსულტაციო საბჭოს წევრებს დეტალურად გააცნო პროექტის ,,შეზღუდული შესაძლებლობის მქონე პირთა განათლების და დასაქმების ადვოკატირება და ლობირება’’ მიზნები და ამოცანები.
დაიგეგმა ,,შეზღუდული შესაძლებლობების მქონე პირთა განათლებისა და დასაქმების თანაბარი ხელმისაწვდომობის ადვოკატირების საპილოტე პროგრამის ფარგლებში დასაქმებული 62 შშმ პირის კვლევა. საკონსულტაციო საბჭოს წევრებმა კვლევასთან დაკავშირებით კონკრეტული რჩევები მისცეს საპროექტო ჯგუფს. ასევე განისაზღვრა, რომ საკანონმდებლო ინიციატივების შემუშავებისა და საკანონდმებლო ორგანოში მისი წარდგენის პროცესში ჩაერთოს სახალხო დამცველის აპარატი.
პროექტს ,შეზღუდული შესაძლებლობის მქონე პირთა განათლების და დასაქმების ადვოკატირება და ლობირება’ახორციელებს ქუთაისის განათლების განვითარების და დასაქმების ცენტრი, თელავის განათლების განვითარების და დასაქმების ცენტრთან და ქვეითსაწინააღმდეგო ნაღმების აკრძალვის საერთაშორისო კამპანიის საქართველოსკომიტეტთან "ოტავა–98" ერთად, ევროკავშირის ფინანსური მხარდაჭერით.