10 დეკემბერს, ცაგერის №1 საჯარო სკოლაში სამოქალაქო განათლების პროგრამაში "მომავლის თაობა" ჩართული რაჭა–ლეჩხუმისა და ქვემო სვანეთის რეგიონის საჯარო სკოლების სამოქალაქო კლუბების შუალედური შემაჯამებელი ღონისძიება გაიმართა. ღონისძიებას ესწრებოდნენ ცაგერის საგანმანათლებლო რესურს ცენტრის ხელმძღვანელი ირაკლი სილაგაძე, PH International –ის რეგიონალური ორგანიზაციების ქსელის მენეჯერი თამუნა ფრუიძე, საჯარო სკოლების დირექტორები, პედაგოგები, მოსწავლეები, ადგილობრივი თვითმმართველობების წარმომადგენლები.
ღონისძიების დაწყებამდე სტუმრებმა სამოქალაქო კლუბების მუშაობის ამსახველი ფოტო გამოფენა დაათვალიერეს.
თავად ღონისძიებაზე კი კლუბის წევრებმა 2015 წლის სექტემბრიდან დღემდე განხორციელებული აქტივობებისა და ბლოგების პრეზენტაციები, ასევე პროგრამის ფარგლებში შექმნილი ვიდეო რგოლი წარმოადგინეს.
დასასრულს ქუთაისის განათლების განვითარების და დასაქმების ცენტრის დირექტორმა ლიკა კილაძემ ონის მუნიციპალიტეტის გამგებელს გიორგი ლობჯანიძეს და ცაგერის მუნიციპალიტეტის გამგებლის წარმომადგენელს სოფ. ჩხუტელის ადმინისტრაციულ ერთეულში ბადრი სილაგაძესა სამოქალაქო კლუბებთან თანამშრომლობისათვის სამადლობელი წერილები გადასცა. საუკეთესო ინიციატივის ნომინაციაში გამარჯვებულ ცაგერის მუნიციპალიტეტის სოფელ ჩხუტელის საჯარო სკოლის სამოქალაქო კლუბს ,,გზა მომავლისკენ'' კი – დიპლომი და მაგნიტური დაფა.
სამოქალაქო განათლების პროგრამაში ,,მომავლის თაობა'' რაჭა–ლეჩხუმისა და ქვემო სვანეთის რეგიონის 10 საჯარო სკოლაა ჩართული.