რეგიონული მედიის ასოციაცია 30 ნოემბერს და 1 დეკემბერს ქუთაისში, ახალგაზრდებისათვის საარჩევნო უფლებებზე სემინარს გამართავს.
ორდღიანი ტრენინგის პირველი დღე ინფორმაციული იქნება. რეგიონული მედიის ასოციაციის იურისტი პაატა ცნობილაძე, მოწვეულ ტრენერთან - ქეთევან მამამთავრიშვილთან ერთად, ახალგაზრდებს საქართველოს სახელმწიფოებრივი მოწყობის მოდელს, ქვეყნის მართვის პროცესში ამომრჩევლის მონაწილეობის გზებს (რა არის დემოკრატია, არჩევნები, რეფერენდუმი და პლებისციტი), არჩევითი ორგანოების ფორმირებასა და ქვეყანაში არსებულ საარჩევნო კანონმდებლობას გააცნობს.
ტრენინგის პირველი დღე ასევე დაეთმობა წინასაარჩევო კამპანიას, პოლიტიკური პარტიებისა თუ სუბიექტების უფლებამოსილებას, საარჩევნო უბნის გახსნიდან დახურვამდე არსებული პროცედურების გაცნობას.
მეორე დღეს კი ტრენინგი იმიტირებული საარჩევნო პროცესით გაგრძელდება. ახალგაზრდები მონაწილეობას მიიღებენ არჩევნების იმიტაციაში და ყველა იმ პროცედურას შეასრულებენ, რაც საარჩევნო უბნის გახსნიდან მისი დახურვის პერიოდამდე გრძელდება.
ტრენინგის მონაწილეებს სამახსოვრო საინფორმაციო მასალა დაურიგდებათ და სერტიფიკატები გადაეცემათ.
ტრენინგი „რეგიონული მედიის ასოციაციის“ პროექტის - „რეგიონული მედია ახალგაზრდების საარჩევნო ინფორმირებისა და განვითარებისთვის“ - ფარგლებში ჩატარდება. პროექტს „საარჩევნო სისტემების განვითარების, რეფორმებისა და სწავლების ცენტრი“ აფინანსებს.
სემინარი გაიმართება 30ნოემბერს და 1 დეკემბერს 11 საათიდან 17 საათამდე, შემდეგ მისამართზე: ქუთაისი, რუსთაველის 37, პრესის სახლი, მე-4 სართული, გაზეთ „პოსტსკრიპტუმის“ რედაქცია. დასწრება თავისუფალია.
დამატებითი ინფორმაციისათვის დაუკავშირდით პროექტის დირექტორს, ნატო გუბელაძეს 577247711; 599 107794