ქუთაისის მერი შოთა მურღულია მერიის თეთრ დარბაზში ქუთაისის აკ. წერეთლის სახელობის უნივერსიტეტის სტუდენტებს შეხვდა. ამ სტუდენტების მონაწილეობა ტაო-კლარჯეთის სამეცნიერო ექსპედიციაში ქუთაისის მერიის თანადაფინანსებით მოხერხდა.
დიალექტოლოგიური პრაქტიკის გასვლითი ტური საქართველოს უძველეს მხარეში, ჰუმანიტარული ფაკულტეტის ქართული ენისა და ლიტერატურის სპეციალობის 20-მა სტუდენტმა გაიარა. პროფესორ ტარიელ ფუტკარაძისა და ეკა დადიანის ხელმძღვანელობით სტუდენტები 11 დღის განმავლობაში სტუმრობდნენ ადგილობრივ თანამემამულეებს, იწერდნენ დიალექტიკურ ტექსტებს, მეტყველების ნიმუშებს, ეცნობოდნენ წეს-ჩვეულებებს. მათ მოინახულეს ისტორიულ-კულტურული მემკვიდრეობის ქრისტიანული ძეგლები. ექსპედიცია აგვისტოს თვეში განხორციელდა. იგი მიზნად ისახავდა იმერხევსა და ტაოში მცხოვრებ ქართველებთან კავშირ-ურთიერთობების გაღრმავებასა და ახალი კონტაქტების მოძიებას.