უკრაინის დედაქალაქ კიევში ოფიციალური ვიზიტით მყოფმა ქალაქ ქუთაისის მუნიციპალიტეტის დელეგაციამ, შეხვედრა გამართა უკრაინული ავიაკომპანია “Yan Air”-ის გენერალურ დირექტორთან იაროსლავ აგაფონოვთან.
შეხვედრაზე მოხდა შეთანხმება, ქუთაისის საერთაშორისო აეროპორტში უკრაინის სამი ქალაქიდან (კიევი, ხარკოვი, ოდესა) პირდაპირი ავია რეისების დანიშვნის შესახებ.
“Yan Air”-ის გენერალურმა დირექტორმა აღნიშნა, რომ ავია კომპანია სრულად არის მზად ქუთაისის მიმართულებით ფრენების განსახორციელებლად.
ქუთაისის მუნიციპალიტეტის დელეგაციამ აიღო პასუხისმგებლობა, თვითმმართველობამ შეასრულოს შუამავლის ფუნქცია ავია კომპანია “Yan Air”-სა და საქართველოს აეროპორტების გაერთიანებას შორის ავია რეისების დანიშვნის მიზნით გასამართ მოლაპარაკებებში.
ქუთაისის მუნიციპალიტეტის დელეგაციაში შედიან: დავით დვალი - ქალაქ ქუთაისის საკრებულოს თავმჯდომარე, კონსტანტინე ქავთარაძე - ქალაქ ქუთაისის მერის მოადგილე, ბექა ყანჩელი - ქალაქ ქუთაისის საკრებულოს თავმჯდომარის მოადგილე, პაატა კლდიაშვილი - ქალაქ ქუთაისის მერიის ეკონომიკური განვითარებისა და ადგილობრივი თვითმმართველობის ქონების მართვის სამსახურის უფროსი, ირაკლი სარიშვილი - ქალაქ ქუთაისის მერიის ეკონომიკური განვითარებისა და ადგილობრივი თვითმმართველობის ქონების მართვის სამსახურის უფროსის მოადგილე.
შეხვედრას ასევე ესწრებოდნენ უკრაინის ტურიზმის განვითარებს ცენტრის დირექტორი ვლადიმირ ცარუკი და უკრაინაში საქართველოს საელჩოს წარმომადგენელი ალექსანდრე ყიფიან.