როგორც ცნობილი გახდა, საქართველოს პრეზიდენტმა, გიორგი მარგველაშვილმა უზენაესი სასამართლოს თავმჯდომარის 28 კანდიდატიდან პარლამენტს ამ პოსტზე დასამტკიცებლად ნინო გვენეტაძე წარუდგინა.

ნინო გვენეტაძის კანდიდატურა უზენაესი სასამართლოს თავმჯდომარის პოსტზე შემდეგ ორგანიზაციებს ჰყავდათ წარდგენილი:  არასამთავრობო ორგანიზაციები: „ადამიანის უფლებათა ცენტრი“ ალეკო ცქიტიშვილი;„საზოგადოებრივი დამცველი“ ირინა ფუტკარაძე, „ახალგაზრდები სამართლიანობისთვის“ თამარ გაბიანი, „მედიის ინსტიტუტი“ ირმა მამასახლისი, „იურისტ ქალთა კავშირი“ ნუკა კობალავა, ა.ი.პ „გენდერული თანასწორობის კვლევისა და განვითარების ინსტიტუტის“ აღმასრულებელი დირექტორი, მეცნიერებათა დოქტორი, თამარ კუჭავა, არასამეწარმეო (არაკომერციული) იურიდიული პირი „ახალგაზრდა ადვოკატები“ ხელმძღვანელი არჩილ კაიკაციშვილი, თ.წერეთლის სახელმწიფოსა და სამართლის ინსტიტუტის სამეცნიერო საბჭოს თავმჯდომარე, სისხლის სამართლისა და კრიმინოლოგიის განყოფილების ხელმძღვანელი, პროფესორი ოთარ გამყრელიძე.

ნინო გვენეტაძის მოკლე ბიოგრაფია ასეთია: იგი  1964 წლის 27 იანვარს ხაშურში დაიბადა. პროფესიით სამართალმცოდნეა. არის  თსუ-ს ასოცირებული პროფესორი და ქართულ-ამერიკული უნივერსიტეტის პროფესორი, სამაგისტრო და სადოქტორო პროგრამების ხელმძღვანელი.

ნინო გვენეტაძე – (1998-1999) წლებში "საქართველოს ახალგაზრდა იურისტთა ასოციაციის“ თავმჯდომარე იყო. იგი 1999–2005წლებში უზენაესი სასამართლოს მოსამართლედ მუშაობდა.

ცნობილი ფაქტია, რომ უზენაესი სასამართლოს მოსამართლეები: ნინო გვენეტაძე, დავით სულაქველიძე და მერაბ ტურავა პირველები იყვნენ, რომლებმაც  2005 წელს,  უზენაესი სასამართლოს თავმჯდომარე კოტე კუბლაშვილი და იუსტიციის საბჭოს თავმჯდომარე ვალერი ცერცვაძე მოსამართლეებზე განხორციელებულ ზეწოლაში დაადანაშაულეს.

ნინო გვენეტაძე 2008 წლის საპარლამენტო არჩევნებშიც მონაწილეობდა და  კენჭს რესპუბლიკური პარტიიდან ხაშურში იყრიდა.