ბინების ფასი დაეცა და კიდევ უფრო დაეცემა

დედაქალაქის ცენტრალურ უბნებში უძრავი ქონება, წინა წლის ანალოგიურ პერიოდთან შედარებით, 5-7%-ით გაიაფდა. ცვლილება განსაკუთრებით მეორად საცხოვრებელ ბინებს შეეხო. დეველოპერთა ინფორმაციით, ცენტრალურ უბნებში მოთხოვნა განსაკუთრებით ახალაშენებულ ბინებზეა. ამ შემთხვევაში ფასი მეტ-ნაკლებად შენარჩუნდა. საპირისპირო ტენდენციაა გარეუბნებში, სადაც მოთხოვნა ძირითადად მეორად ბინებზე ჭარბობს.

რეალიზაციამ თბილისის მთელ ტერიტორიაზე იკლო. დეველოპერები ვარაუდობენ, რომ საბაზრო ცვლილებები ფასს სამომავლოდ კიდევ უფრო დაწევს. უძრავი ქონების სააგენტოების მენეჯერები საუბრობენ სხვადასხვა მიზეზებზე, რამაც ბინებზე მოთხოვნის შემცირება განაპირობა. პირველ რიგში, ეს სავალუტო რყევას უკავშირდება. ეროვნული ვალუტის გაუფასურებამ და იპოთეკურ სესხებზე ხელმისაწვდომობის გართულებამ უძრავი ქონების ბაზარს გარკვეული პრობლემა შეუქმნა.

კომპანია ”სიგმას” დირექტორი ზურაბ ლაჩაშვილი განმარტავს, რომ ძველმა, საბჭოთა პერიოდში აშენებულმა სახლებმა პოპულარობა დაკარგა და ის მყიდველისთვის უკვე აღარ არის მიმზიდველი, თუმცა მომხმარებლის ასეთი განწყობა გარეუბნებზე არ ვრცელდება.

”უძრავ ქონებაზე მეტი მოთხოვნა ჯერჯერობით გარეუბნებშია, სადაც ბინებზე ფასი მეტ-ნაკლებად შენარჩუნდა. ცენტრში უფრო ახალაშენებული ბინები იყიდება. საბჭოთა პერიოდში აშენებული ბინა მომხმარებელს უკვე მორალურადაც აღარ უნდა. ვისაც აქვს, ისიც ცდილობს გაყიდვას და ახალი ბინის ყიდვას ბანკების დახმარებით თუ სხვა საშუალებით. რეალიზაციაზე სხვადასხვა ფაქტორი მოქმედებს, ასეთია თუნდაც ქვეყნის ეკონომიკური მდგომარეობა, ფულად-საკრედიტო პოლიტიკა, ინვესტიციები და სხვა. ბაზარზე აშკარად შეიმჩნევა მოქალაქეთა გარკვეული განწყობილებისა და გემოვნების ასახვა. აქედან გამომდინარე, მეორად ბინებზე ფასმა დაახლოებით 5-7%-ის ფარგლებში იკლო, ახლებზე კი მეტ-ნაკლებად შენარჩუნდა. ამიტომაა, რომ გარეუბნებში მშენებლობა ნაკლებად მიმდინარეობს, ვიდრე დედაქალაქის ცენტრში. ფასზე გავლენა კონკურენციამაც განსაზღვრა. ბოლო დროს ბაზარზე ბევრი კომპანიაა, რომელიც მშენებლობითა და ბინების რეალიზაციითაა დაკავებული. ფაქტობრივად, დიდია მიწოდება, მოთხოვნა- ნაკლები და ამგვარმა დისბალანსმა ფასზეც ადეკვატურად იმოქმედა,” - აცხადებს ლაჩაშვილი.

უძრავი ქონების სააგენტო ”კიბეს” დირექტორი ნელი გოგუაძე აცხადებს, რომ ბოლო დროს ბინების ყიდვაც და გაქირავებაც უჭირთ. მისი თქმით, უკიდურესი აუცილებლობის გარდა, ბინების გაყიდვა-გაქირავებაზე მოთხოვნა მკვეთრად შემცირდა, რამაც გარკვეული გავლენა ფასზეც მოახდინა.

”ლარის კურსის დევალვაციამ და მისმა არასტაბილურობამ უძრავი ქონების ბაზარზე ცუდი გავლენა მოახდინა. როგორც კი ეს პროცესი დაიწყო, რეალური მყიდველი დავკარგეთ, ცენტრალურ უბნებში ამას ფასთა მკვეთრი ცვლილება არ მოჰყოლია, უფრო გაიაფდა ე.წ. პრობლემური ბინები. ის კი, ვისაც არ ეჩქარება, უძრავ ქონებას არ გააიაფებს. პრობლემას ვაწყდებით ბინის გაქირავებაზეც. ამ მიმართულებითაც შეიცვალა ვითარება. მოსახლეობას დოლარში დაქირავება უჭირს. ამიტომ ბინის მფლობელები დათმობაზეც მოდიან. ბოლო დროს ძალიან ხშირად გვესმის, რომ ”ფასზე შეიძლება დალაპარაკება”. ცდილობენ, ამით მომხმარებელი მიიზიდონ. ასეთი დამოკიდებულება გაჩნდა გაყიდვის შემთხვევაშიც. ყველა შემკვეთი ითხოვს, რომ დავეხმაროთ ბინის გაყიდვასა და გაქირავებაში, მაგრამ თითქმის არც ერთი შემთხვევა არ გვაქვს, რომ პირიქით ითხოვდნენ”, - ამბობს ნელი გოგუაძე.

მდგომარეობას უიმედოდ წარმოგვიდგენენ მაკლერები, რომლებიც აცხადებენ, რომ ზედიზედ რამდენიმე თვეა, ბინებს ვერ ყიდიან. სააგენტო ”ჯეოფლათის” წარმომადგენელი ”რეზონანსთან” საუბრისას აღნიშნავს, რომ მოთხოვნა მეტ-ნაკლებად იაფფასიან ბინებზეა შენარჩუნებული და, ძირითადად, გარეუბნებში იყიდება.

”გასაყიდი ბინა ბევრია, მაგრამ არ გვყავს რეალური მყიდველი. ძნელად დასაჯერებელია, მაგრამ ზოგჯერ მთელი თვე ისე გავა, 2 ბინის გაყიდვას ძლივს ვახერხებთ, ხოლო ზოგიერთი სახლი თვეობით არის გასაყიდი. ასეთი მდგომარეობა ბაზრისთვის ძალიან ცუდი ტენდენციაა. ვისაც ეჩქარება, ფასს აკლებს, მაგრამ ბინის მფლობელების უმეტესობა ასეთ დათმობაზე არ მიდის. მყიდველიც უფრო პრეტენზიულია, მყარად ნაშენ კორპუსებში ცდილობენ ბინის ყიდვას, როგორიცაა ”ჩეხური”, ”ყავლაშვილი”, ”იუგოსლავიური” და რამდენიმე სხვა პროექტი, რომელიც კომუნისტურ პერიოდში აშენდა. პარალელურად, შემცირდა მოთხოვნა ”ქალაქური”, ”მოსკოვის”, ”კიევისა” და რამდენიმე სხვა პროექტის ბინებზე, რომლებიც გასული საუკუნის 60-იან წლებშია აშენებული, მაგრამ დიდი მოწონებით არც მაშინ სარგებლობდა. ბოლო დროს მან მიმზიდველობა კიდევ უფრო დაკარგა”, - ამბობს გიო გამყრელიძე, სააგენტო ”ჯეოფლათის” წარმომადგენელი.

მაკლერების ნათქვამს უძრავი ქონების სფეროს ექსპერტებიც ადასტურებენ. მათი ინფორმაციით, მყიდველებს მეორადი ბინების მიმართაც საკმაოდ მკაცრი მოთხოვნები აქვთ: თუ ბინა მაღალჭერიანია და მკვიდრად ნაშენი, მხოლოდ მაშინ ყიდულობენ. ასეთი ბინა კი საკმაოდ რთული მოსაძებნია. ძალიან ხშირია მინიშნება, ასევე დიდია ავარიული სახლების რაოდენობაც და, რა თქმა უნდა, ასეთ ბინაში ფულის ჩადებას ყველა ერიდება.

”მიშენებულ ბინებზე ფასი საგრძნობლად შემცირებულია. ამ შემთხვევაში იზოლაცია დარღვეულია და ბინა მდგრადობით არ გამოირჩევა. მოთხოვნა უფრო დაბალფასიან ბინებზეა. ჩემი აზრით, მარტიდან ახალი ტენდენცია გაჩნდება. ამ მოლოდინს აძლიერებს ის ფაქტი, რომ შეცვლილია საბაზრო სიტუაციაც და დანერგილია ახალი სტანდარტიც. ბაზარზე სხვა მოთხოვნებიც გაჩნდა. ”გაქრა ინტერესი ”შავი კარკასების” მიმართ, ნაკლებად ყიდულობენ. მოთხოვნა იზრდება ახალაშენებულ და დამთავრებულ ბინებზე, ასევე მეტი ინტერესია საოფისე ფართებსა და მიწის ნაკვეთებზე. ეს პროცესი ბოლო დრომდე აშკარად გამოკვეთილი იყო, მაგრამ ლართან დაკავშირებულმა პანიკამ მდგომარეობა შეცვალა. იმედი მაქვს, გაზაფხულიდან სიტუაცია მოწესრიგდება და მოთხოვნა მოიმატებს, შესაძლოა, მან გავლენა ფასზეც მოახდინოს”, - ამბობს მზია თოლორდავა, ექსპერტი.

მარი ჩიტაია
წყარო: გაზეთი ”რეზონანსი”