გივი ფანჩულიძეს თანამშრომელთა „ექსპლუატაციასა“ და „ღამის ფართებისთვის“ ფულის აკრებას ედავებიან
ქუთაისის მერიის დაქვემდებარებაში მყოფი ყინულის მოედნის აიპ-ის 8 თანამშრომელს მიმდინარე წლის ზაფხულში დირექტორმა ყოველგვარი გაფრთხილების გარეშე ხელშეკრულება შეუჩერა. გათავისუფლებულთა ნაწილმა მომხდარი გააპროტესტა და მოედნის ხელმძღვანელობის წინააღმდეგ სასამართლო დავა წამოიწყო.
ქუთაისის საქალაქო სასამართლომ ყოფილი თანამშრომლების სარჩელი დააკმაყოფილა, ყინულის მოედნის ხელმძღვანელობას თანამშრომლებისთვის კომპენსაციის გადახდა დააკისრა. თუმცა, დავა ამით არ დასრულებულა. ყინულის მოედნის დირექტორმა გივი ფანჩულიძემ სასამართლოს გადაწყვეტილების სააპელაციოში გასაჩივრება გადაწყვიტა, ყოფილ თანამშრომლებს უთხრა, რომ ეს მერიის მოთხოვნა იყო.
დავის შესახებ დეტალურ ინფორმაციას არ ფლობს მერიის იურიდიული განყოფილების ხელმძღვანელი ირაკლი გიორგაძე. როგორც მან აღნიშნა, აიპ-თან ამ საკითხზე თანამშრომლობა მხოლოდ კონსულტაციით შემოიფარგლება. რაც შეეხება გადაწყვეტილებებს, „ყინულის მოედანი“, როგორც კერძო სამართლის იურიდიული პირი, თავად იღებს.
„კულუარებში“ საუბრობენ, რომ გივი ფანჩულიძემ თანამშრომლებს ხელშეკრულებები არა ოპტიმიზაციის, არამედ პირადი ინტერესების და „კრიშის“ გარეშე დარჩენის გამო შეუჩერა. როგორც აღნიშნავენ, დირექტორი ყოფილ მეგობრებს პოლიტიკური ამინდის მიხედვით ირჩევს და ანგარიშს უწევს.
პირად ინტერესებთან ერთად, არასათანადო დამოკიდებულება გახდა მომავალ თანამშრომლობაზე უარის მიზეზი, რის გამოც გათავისუფლებულმა თანამშრომლებმა (ლაშა ლიპარტიანი, ნათია გუბელაძე, პოლიკარპე როხვაძე, გოჩა ბაზანდარაშვილი)სასამართლოს არა სამსახურში აღდგენის მოთხოვნით, არამედ მხოლოდ კომპენსაციისთვის მიმართეს.
„უკანონოდ და უსამართლოდ მოიქცა. ამიტომ დააკმაყოფილა სასამართლომ სარჩელი. ჩვენ არ მოგვითხოვია თანამდებობაზე აღდგენა, რადგან აღარ გვაქვს სურვილი, გივი ფანჩულიძის ხელქვეითები ვიყოთ. ეს კაცი, როგორც დირექტორი, არ არის კარგი კადრი“ – განაცხადა ყინულის მოედნის ყოფილმა თანამშრომელმა, ლაშა ლიპარტიანმა.
ერთ-ერთი თანამშრომელი კი დირექტორის საქციელს გაცილებით მწვავე შეფასებას აძლევს და „არაკაცურს“ უწოდებს. ამავდროულად, სამსახურში ყოფნის პერიოდში დირექტორთან კარგ ურთიერთობაზეც საუბრობს.
„ეგ ადამიანი არაკაცურად მოიქცა. თუ გაშვება უნდოდა, ეთქვა და წამოვიდოდი. არ მივმართე სასამართლოს, რადგან არ მინდოდა ჩივილები და მსგავსი რამეები. რაც მაქვს სათქმელი, პირადად რომ ვნახავ, მაშინ ვეტყვი. იმიტომ თუ გამომიშვა, რომ მე ყოფილმა ხელისუფლებამ დამნიშნა, მაშინ ეგეც წინა ხელისულების მიერ „ნაცნობობით“ მოხვდა ამ პოსტზე და არა პროფესიული ღირსების გამო. ეთქვა და გავიგებდი, რომ საჭირო აღარ ვიყავი, ესე რომ არ გამოვეშვი, არ შეიძლებოდა? იცით რა არის, მას უნდა, ყველა ფეხქვეშ ეგებოდეს და მის სურვილებს ასრულებდეს, როგორც უნდა, ისე, თავის ნებაზე ათამაშებს და აშანტაჟებს თანამშრომლებს. იმასაც კი იძახის: „მე თუ მერიაში „წამკუზავენ“, კარგი დღე არც თქვენ დაგადგებათო!“ – განაცხადა ყოფილმა თანამშრომელმა, რომელმაც ვინაობის გამხელა არ ისურვა.
***
გივი ფანჩულიძე ყინულის მოედნის დირექტორის თანამდებობაზე 2011 წელს გია თევდორაძის მერობის დროს დაინიშნა. როგორც მაშინ ვრცელდებოდა ინფორმაცია, ფანჩულიძეს თანამდებობაზე რეკომენდაცია ყოფილი მერის ახლობელმა გაუწია და ყინულის მოედანი ქუთაისის ლადო მესხიშვილის სახელწიფო დრამატული თაეტრის იმჟამინდელ ბარმენს ჩააბარეს. თავის მხრივ, ფანჩულიძემ მოედანზე საკუთარი გუნდი შემოიკრიბა, რომელთა შორისაც თეატრის რამდენიმე თანამშრომელი და ახალი დირექტორის მეგობარი იყო. სწორედ ეს მეგობრები აღმოჩნდნენ ხელშეკრულებაშეჩერებულ თანამშრომელთა რიგებში და როგორც დირექტორი ამბობს, ეს არა პირადი ინტერესების, არამედ მოედანზე განხორციელებული კადრების ოპტიმიზაციის გამო მოხდა.
გივი ფანჩულიძე
|
„აბსურდულია ბრალდება, რომ ვინმე პირადი ინტერესების გამო გავუშვი. ოპტიმიზაცია და შტატების გაუქმება მოხდა, ამიტომ აღარ გავუგრძელეთ ხელშეკრულება. ვინც ამბობს, რომ ეს პირადი ინტერესების გამო გავაკეთე, მაშინ დააკონკრეტოს, რას გულისხმობს. ზოგადად, ვინც მიდის სამსახურიდან, ყველა ასე ამბობს. უბრალოდ, ეს შტატები აღარ იყო საჭირო. ეს ჩვეულებრივი მუშა პროცესია, შტატის ხან დამატება გვჭირდება, ხანაც პირიქით – შემცირება. ეს არაა ჩემი კერძო ბიზნესი, სახელმწიფო სამსახურია, მე მხოლოდ შუამავალი ვარ დაქირავებულსა და სახელმწიფოს შორის“ – აღნიშნავს ფანჩულიძე.
კითხვაზე, მოხდა თუ არა თანამშრომლებისთვის ხელშეკრულების შეჩერება ყოველგვარი გაფრთხილების გარეშე და იყო თუ არა ეს კანონდარღვევა? – გვპასუხობს: „გაფრთხილება არ მომხდარა, ხელშეკრულებები ვადის გასვლის შემდეგ ავტომატურად შევუჩერეთ. რაც შეეხება, არის თუა არა ეს კანონდარღვევა, ვერ გიპასუხებთ, ვინაიდან მე იურისტი არ ვარ და იურიდიულად ვერ განვიხილავ. თქვენ რა გაინტერესებთ, რა მოხდა, თუ როგორ ფუნქციონირებს ყინულის მოედანი?“
დირექტორისგან განსხვავებით, მომხდარს კანონდარღვევას უწოდებს იურისტი. რომელიც განმარტავს, რომ საჯარო სამსახურის თანამშრომლისთვის ერთთვიანი ხელშეკრულების გაფორმება განუსაზღვრელი დროით შეიძლება, თუმცა, ხელშეკრულების სამი თვის განმავლობაში სისტემატურად გაფორმების შემდეგ, თანამშრომელი ავტომატურად სარგებლობს გრძელვადიანი ხელშეკრულების პრინციპებით. მისი გაუფრთხილებლად გათავისუფლება კი კანონდარღვევაა. სავარაუდოდ, სწორედ ეს არგუმენტი გახდა სასამართლოს მიერ თანამშრომლების სარჩელის დაკმაყოფილების მიზეზი.
მიმართა თუ არა სააპელაციო სასამართლოს მერიის მოთხოვნით, დირექტორი ჩვენთან საუბარში არ ადასტურებს, თუმცა, როგორც ყოფილი თანამშრომლები აღნიშნავენ, ფანჩულიძემ მათთან საუბარში სასამართლოს გადაწყვეტილების გასაჩივრების ინიციატორად ქუთაისის მერია დაასახელა და გამოაცხადა, რომ თავად კომპენსაციის გადახდაზე თანახმა იყო.
მერიის მიერ განაჩენის სააპელაციოში გასაჩივრების მოთხოვნას არ ადასტურებენ ადგილობრივ ხელისუფლებაში. როგორც მერიაში განმარტავენ, მერიაში არც განაჩენის სააპელაციოში გასაჩივრება მოუთხოვია და არც ყინულის მოედანზე განვითარებულ მოვლენებზე ფლობენ დეტალურ ინფორმაციას. თუმცა, აღსანიშნავია, რომ ყინულის მოედნის შემცირებული შტატისთვის ახალ სახელფასო განაკვეთს ხელს უშუალოდ ქალაქის მერი შოთა მურღულია და მერიის საფინანსო პოლიტიკისა და სახელმწიფო შესყიდვების სამსახურის ხელმძღვანელი ირაკლი ავალიანი აწერენ.
ყინულის მოედნის ბიუჯეტი 2012 წელს 404 000 ლარი იყო, მომავალ წელს 24 000 ლარით შემცირდა და 380 000 ლარი შეადგინა, 2014 წელს მერიის აიპ-ის ბიუჯეტი კი 2 000 ლარით გაიზარდა და 382 000 ლარი გახდა. რაც შეეხება მომავალ წელს, მიუხედავად შტატების შემცირებისა, აიპი კვლავ 382 000 ლარს ითხოვს, თუმცა, მერია ქალაქის მთავარ ფინანსურ დოკუმენტზე ამ დრომდე მუშაობს და ზუსტი ციფრები, ჯერჯერობით, უცნობია.
შემცირებული შტატების პირობებში სახელფასო ფონდი ერთი თვის განმავლობაში 16 697 ლარია, რაც წლის განმავლობაში 200 364 ლარს შეადგენს. მიუხედავად არსებული მონაცემებისა, მერიის საფინანსო სამსახურის უფროსი, ირაკლი ავალიანი აღნიშნავს, რომ ყინულის მოედნის სახელფასო ფონდი 382 000 ლარის მხოლოდ მიზერული ნაწილია და ვინაიდან მოედანი არ არის კაპიტალური, შესაბამისად, თანხები კომუნალურ გადასახადებსა და მოედნის შენახვაზე იხარჯება.
თანამშრომელთა შორის ყველაზე დაბალი ექიმის ხელფასია – 350 ლარი. მოედანზე ექიმის ორი შტატია, თუმცა, ამ დროისთვის ბავშვების ჯანმრთელობაზე მხოლოდ ერთი ექიმი ზრუნავს, რომელიც ნახევარ განაკვეთზე მუშაობს. დარჩენილი დღეები კი ყინულის მოედნის მოსწავლეები ექიმის მეთვალყურეობის გარეშე რჩებიან. შტატის აუთვისებლობას დაბალ ხელფასს არ უკავშირებს ყინულის მოედნის დირექტორი და ამბობს, რომ ამ დრომდე მასთან სამუშაოს მსურველი ლიცენზირებული ექიმი არ მისულა, რომელიც სამსახურზე მხოლოდ უარს მცირე ანაზღაურების გამო იტყოდა.
21 თანამშრომლიანი ყინულის მოედნის დირექტორს ორი მოადგილე ჰყავს, რომელთა ანაზღაურებაც 1300 ლარია. სჭირდება თუ არა ორი მოადგილე ყინულის მოედნის ადმინისტრაციას გამართულად მუშაობისთვის? – დირექტორი კონკრეტულ პასუხს ვერ გვცემს და განმარტავს, რომ მოადგილეები მისი არყოფნის დროს დირექტორის სამუშაოს ასრულებენ და სწორედ ერთობლივი საქმიანობის შედეგია მოედნის გამართული და წარმატებული მუშაობა.
საინტერესოა ფაქტი, რაც ერთ-ერთი მოადგილის დანიშვნას უკავშირდება. დავით შარაბიძე, ქუთაისის ყოფილი ვიცე-მერის გია შარაბიძის ვაჟია. შარაბიძე ყინულის მოედნის დირექტორის მოადგილედ სწორედ იმ დროს დაინიშნა, როდესაც ქუთაისის მერის მოვალეობას გია შარაბიძე ასრულებდა. ანუ, როგორც მაშინ ამბობდნენ, შარაბიძემ მოასწრო და შვილს კარგი სამსახური „გაუჩალიჩა“, თუმცა, სატელეფონო საუბარში ყოფილმა ვიცე-მერმა თავიდან ვერ შეძლო, გაეხსენებინა, როდის დაინიშნა მისი შვილი მოადგილედ, მოგვიანებით კი აღნიშნა, რომ მის მიერ მერის მოვალეობის შესრულების პერიოდში მისი შვილი მერიის ეკონომიკის სამსახურში მუშაობდა, რასაც კანონი კრძალავდა. ამიტომ მანვე გაათავისუფლა შვილი დაკავებული თანამდებობიდან, რომელმაც, ყოფილი ვიცე-მერისსავე განმარტებით, ყოველგვარი ნეპოტისმის გარეშე თავად მოძებნა სამსახური ყინულის მოედანზე. მისივე თქმით, ამ ფაქტთან კი მერის მოვალეობის იმჟამინდელ შემსრულებელს არავითარი კავშირი არ ჰქონია.
მეორე მოადგილე კი ასევე მესხიშვილის დრამატული თეატრის ყოფილი მსახიობი, გიგა ჩიქოვანი, თავად დირექტორმა შეარჩია.
ყინულის მოედნის დირექტორის მისამართით ბრალდებებს ადამიანური ურთიერთობების კუთხითაც გამოთქვამენ და ამბობენ, რომ დირექტორი თანამშრომელთა მანიპულირებას ერთთვიანი ხელშეკრულებით ცდილობს. სამსახურის დაკარგვით აშანტაჟებს. შიშის ფაქტორს უკავშირებენ რამდენიმე თანამშრომელის მიერ დირექტორისთვის სახლში რემონტის გაკეთებაც.
ბრალდებას კატეგორიულად უარყოფს გივი ფანჩულიძე, რომელმაც თავდაპირველად მისი მისამართით გამოთქმულ შენიშვნას აბსურდული უწოდა, მოგვიანებით კი აღნიშნა, რომ ყინულის მოედანზე დასაქმებული ადამიანები მისთვის არა მხოლოდ თანამშრომლები, არამედ მეგობრებიც არიან, რომელთა კეთილდღეობაზე პასუხისმგებლობა აკისრია და თუ მეგობარს არასამუშაო საათებში დახმარება სთხოვა, ეს თანამშრომელთა ექსპლუატაციად არ უნდა იყოს აღქმული. დირექტორი სიმართლის დასადგენად ბრალმდებლებს იმ ადამიანების გაცნობას სთავაზობს, რომელთაც მის სახლში რემონტი ჩაატარეს. თუმცა, დირექციის მისამართით გამოთქმული ბრალდება ამით არ სრულდება. ხელმძღვანელს სამსახურში ქეიფებსა და დროსტარებაშიც სდებენ ბრალს და ამბობენ, რომ ყოველ კვირას „სუფრის გასაწყობად“ თანამშრომლებში თანხა იკრიბება. ბოლოს 15-15 ლარი დირექტორის მამის საკურთხის გასაკეთებლად შეგროვდა.
ყინულის მოედნის ადმინისტრაციას ადგილობრივი მოსახლეობაც უპირისპირდება. მათ საციგურაო დარბაზიდან გვიან ღამემდე გამოსული ხმაურის გამო, მერიას საჩივრით არაერთხელ მიმართეს.
ადგილობრივების საქციელში ლოგიკას ვერ ხედავს მოედნის დირექტორი, რომელიც აღნიშნავს, რომ დარბაზიდან მუსიკის ხმა და ოვაციები მხოლოდ ღონისძიებების და ჰოკეისტთა რეპეტიციების დროს გადის.
„ბავშვებს ემოციების გამოხატვას ვერ აუკრძალავ. გაუგებარია და მიუღებელია, რა მოტივით და რატომ აპროტესტებს მოსახლეობა მოედნის ხმაურს, როდესაც სწორედ მათი შვილები და შვილიშვილები სარგებლობენ ამ დარბაზით?“
***
ყინულის მოედანი ამ დროისთვის 5-დან 14 წლამდე ასაკის, დაახლოებით, 700 ბავშვს ემსახურება. მოედანზე სწავლა ნებისმიერი მსურველისთვის უფასოა, სადაც ასევე ჰოკეის სწავლება მიმდინარეობს. აღსანიშნავია, რომ ქუთაისის ყინულის მოედანი არის ერთ-ერთი დარბაზი საქართველოში, რომელსაც ჰოკეისტთა გუნდი ჰყავს.
მიუხედავად იმისა, რომ ქუთაისის მერიაში სპორტული გაერთიანების აიპი ფუნქციონირებს, როგორც ვიცე-მერი ნოდარ მიქიაშვილი აღნიშნავს, ყინულის მოედნის სპორტულ აიპ-ში გაერთიანება არ იგეგმება.
როდის და როგორ დასრულდება დავა ყინულის მოედანის დირექტორსა და ყოფილ თანამშრომლებს შორის, სააპელაციო სასამართლო გადაწყვეტს. როგორც ხელშეკრულებაშეჩერებული თანამშრომლები აღნიშნავენ, არ არის გამორიცხული, საჭიროების შემთხვევაში, სიმართლის დასადგენად უზენაეს სასამართლოსაც მიმართონ.