ამ დღის დაწესების მიზანი უსინათლოთა მიმართ სოლიდარობის გამოხატვის გაძლერება, მათი მდგომარეობის გასაუმჯობესებლად და მათი უფლებების დასაცავად პრობლემებსა და გამოწვევებზე საუბრის გააქტიურებაა.

უსინათლოთა საერთაშორისო დღე ჯანდაცვის მსოფლიო ორგანიზაციის ინიციატივით მსოფლიოში 1984 წლიდან აღინიშნება, საქართველოში კი ეს დღე არასამთავრობო ორგანიზაციის „ვიმეგობროთ“ პროექტ „ვიმეგობროთ უსინათლოებთან“ ფარგლებში პირველად 2010 წელს აღინიშნა.

უსინათლოთა დღე – ამ ადამიანების პირველი მასწავლებლის, ცნობილი ფრანგი ტიფლოპედაგოგის ვალენტინ ჰაიუს დაბადების დღეს უკავშირდება. მე-18-ე საუკუნემდე უსინათლოთათვის სასწავლო დაწესებულებები მსოფლიოში არ არსებობდა – ჰაიუმ, პარიზში (წლების შემდეგ კი სანქტ-პეტერბურგში) უსინათლო ბავშვებისთვის სკოლა დააარსა, სასწავლო მეთოდოლოგია შეიმუშავა, პირველი რელიეფურ-ხაზოვანი ტაქტილური შრიფტი „უნციალი“ შექმნა (შედარებისთვის: ბრაილის შრიფტი არის რელიეფურ-წერტილოვანი) და უსინათლოთათვის პირველი წიგნები დაბეჭდა.

ჩვენ ქვეყანაში კი, უსინათლოთათვის პირველი და დღემდე ერთადერთი სასწავლებელი (N202 საჯარო სკოლა) მე-19-ე საუკუნის ბოლოს დაარსდა.

ცნობისთვის, დღეს მსოფლიოში 50 მილიონზე მეტი უსინათლო ადამიანია, ორგანიზაცია „ვიმეგობროთ“-ის თქმით, საქართველოს სტატისტიკა უცნობია, თუმცა ორგანიზაციის მონაცემებით, მათი რაოდენობა 7000-ს აღემატება. სპეციალისტთა აზრით კი, მხედველობის პრობლემის მქონე ადამიანთა რიცხვი მოიმატებს, – ამბობენ ორგანიზაციაში.

წყარო:kvira.ge