მუნიციპალიტეტების საკრებულოების იმ დეპუტატების ხარჯებს, რომლებიც ხელფასს არ იღებენ, სახელმწიფო აანაზღაურებს. აღნიშნული ინიციატივის შესახებ იმერეთის გუბერნატორმა იმერეთის მუნიციპალიტეტების გამგებლებსა და საკრებულოს თავმჯდომარეებთან შეხვედრისას ისაუბრა.
როგორც ზაზა მეფარიშვილმა აღნიშნა, იმ დეპუტატების ხარჯებს, რომლებიც ხელფასს არ იღებენ ადგილობრივი თვითმმართველობები დაფარავს. საწვავის, ტელეფონის და სამივლინებო ხარჯებისთვის ანაზღაურება 350–დან 400 ლარამდე განისაზღვრება.
დეპუტატის ხარჯები იმ შემთხვევაში ანაზრაურდება, თუ საკრებულოს წევრი ხარჯის გაწევის დამადასტურებელ დოკუმენტს წარმოადგენს.
ზაზა მეფარიშვილმა მუნიციპალიტეტების საკრებულოს თავმჯდომარეებს რეკომენდაციით მიმართა და მოუწოდა, მათ აღნიშნული თანხები ხელფასის სახით არ გასცენ.
„ეს არ არის ხელფასი, უბრალოდ, იმ დეპუტატებისთვის, რომლებიც ხელფასს არ იღებენ, ხარჯების ანაზღაურებაა, ესეც იმ შემთხვევაში, თუ გაწეული ხარჯის დამადასტურებელი დოკუმენტის წარმოდგენა მოხდება. რამდენიმე დღის წინ, როგორც გავიგე, ხელფასის დანიშვნის მოთხოვნით ჭიათურის მუნიციპალიტეტიდან ჩემთან, ქუთაისში, მოდიოდნენ აქციის გასამართად, რაც ყოვლად მიუღებელია,"–განაცხადა მეფარიშვილმა, რომელმაც აღნიშნულ საკითხთან დაკავშირებით საჯაროდ მისცა შენიშვნა ჭიათურის მუნიციპალიტეტის გამგებელს სულხან მახათაძეს.
„ბატონო სულხან, როდესაც თქვენ არჩევნებში მონაწილეობას იღებდით, უნდა გცოდნოდათ, რომ საკრებულოს დეპუტატობა სამსახური არ არის და დეპუტატების ნაწილი ხელფასს ვერ მიიღებდა. ამიტომ ვერ მივიღებთ თქვენს მოთხოვნას. თქვენ თუ უხელფასო დეპუტატებზე გასცემთ ხელფასს, იცოდეთ, აუცილებლად მოვლენ შემოწმებაზე და ამის გამო დაჯარიმდებით, ამიტომ ყველას მოგმართავთ რეკომენდაციით, უხელფასო დეპუტატებს არა ხელფასი, არამედ გაწეული ხარჯების დასაფარი თანხა მისცეთ,“–განაცხადა ზაზა მეფარიშვილმა.