განათლებისა და მეცნიერების სამინისტრო ახალ პროექტზე მუშაობას იწყებს, რომელიც არა მოსწავლეებთან ან მასწავლებლებთან მუშაობას, არამედ მშობლებისთვის სპეციალური პროგრამის განხორციელებას ითვალისწინებს.
პროექტის თანახმად, მშობელი „სკოლის სრულფასოვანი პარტნიორი“ ხდება, რაც ითვალისწინებს: მშობელთან კომუნიკაციის ფორმების დახვეწასა და საინფორმაციო კამპანიის წარმოებას, ეს კი გულისხმობს საინფორმაციო ვიდეორგოლებისა და შემეცნებითი თემატური ბუკლეტების შექმნას, შემეცნებითი თოქ-შოუების გამართვას, საგანმანათლებლო კონფერენციების ორგანიზებას და ა.შ.
„მშობელთა ჩართულობის პროგრამა" 2015 წლიდან ამოქმედდება, მანამდე კი სამინისტროში ბოლო დეტალებს აზუსტებენ.
განათლებისა და მეცნიერების სამინისტროში პროექტის შესახებ განმარტავენ: მშობელთა ჩართულობის პროგრამა გულისხმობს მშობლის დაახლოებას სკოლასთან, შვილის განათლების პროცესში ჩართულობის ხელშეწყობას, სასკოლო ცხოვრების შესახებ მშობელთა ინფორმირებულობის გაზრდასა და მოსწავლის სახლში სწავლების უნარ-ჩვევების გამომუშავების პროცესში მშობლის როლის გაზრდას.