დღეს ქუთაისელები ორმაისობას აღნიშნავენ. დღესასწაულთან დაკავშირებით ქალაქში ხალხმრავლობაა.
„გვირილობის“, ანუ „თეთრი გვირილის დღესასწაულის“ აღნიშვნას ქალაქშ გასული საუკუნის დასაწყისში ჩაეყარა საფუძველი. მაშინ სახალხო ზეიმი გაცილებით მოკრძალებულ სახეს ატარებდა, თუმცა დიდ მისიას ემსახურებოდა:
საქველმოქმედო საზოგადოების მიერ შერჩეული ულამაზესი ბანოვანები და გიმნაზიელი გოგო-ბიჭები ბულვარში გვირილების გაყიდვიდან შემოსულ თანხას ჭლექით დაავადებულთა დასახმარებლად აგროვებდნენ. „გვირილობამ“ და ორმაისობამ უკანასკნელ პერიოდში სულ სხვა ფუნქცია შეიძინა და ქუთაისობის დღესასწაულად გადაიქცა.
ტრადიციულად, დღესასწაულთან დაკავშირებით, მთელი დღის განმავლობაში ქალაქში სხვადასხვა ღონისძიებებია დაგეგმილი, რისთვისაც ბიუჯეტიდან 80 000 ლარია გამოყოფილი.
ქუთაისში დღეს დიპლომატიურ კორპუსს და სხვადასხვა რანგის სტუმრებს ელოდებიან.
დაგეგმილი ღონისძიებების გამო ქალაქის ცენტრალურ ნაწილში ტრანსპორტის მოძრაობა პარალიზებულია.
ორმაისობას გალა-კონცერტი და ლაზერული შოუ დაასრულებს.