ადამიანთა ურთიერთობებს ძალადობა განსაზღვრავს - ზოგი იმონებს, ზოგიც - სხვას ემონება.
საპრეზიდენტო თუ საპარლამენტო არჩევნების პერიოდში ბევრს მიაჩნია, რომ მისი რჩეული ხალხის იმედებს აუცილებლად გაამართლებს.
მაგრამ არჩევნებიდან Sალიან მალე იმედები უცრუვდებათ. ზოგი აღიარებს, რომ არჩევანში შეცდა, ზოგიც - გულს არ იტეხს და მაინც გაიძახის - დრო სჭირდება, ვაცალოთ, ბატონოო. საბოლოოდ, ხალხი სხვა ხელისუფლების მოლოდინით იწყებს ცხოვრებას.
გამოდის, რომ ხალხი ყველა არჩევნებში მოტყუებულია. მართალია, მათ წინა წლების მწარე გამოცდილება აქვთ - აირჩიეს და არ გაუმართლათ, მაგრამ ამჯერადაც იმავეს იმეორებენ და არჩევანში ცდებიან, - ამბობენ ფსიქოლოგები. ადამიანთა ურთიერთობები, ძირითადად, ძალადობაზეა დამყარებული, ხელისუფლების კანდიდატები კი ხალხის მოტყუებას არაფორმალური ურთიერთობებით, მათთან ხშირი კონტაქტითა და ახლო კავშირებით აღწევენ. მათ მიერ ძალაუფლების ხელში აღებისთანავე ეს ურთიერთობები ფორმალურ ხასიათს იღებს და ხელისუფალსა და ხალხს შორის მკაცრი გამიჯვნა ხდება. ფსიქოლოგ გივი მერაბიშვილის თქმით, არაფორმალური, გულახდილი ურთიერთობები ყოველთვის დადებითად აღიქმება.
გივი მერაბიშვილი:
- ფროიდის აზრით, ადამიანებს ყოველთვის გაცნობიერებული არ აქვთ მომავალი მოქმედებები. უმრავლეს შემთხვევაში ისინი არაცნობიერი ფსიქიკით - ინტუიციით, განწყობოლებებით და ა.შ. მოქმედებენ. როცა ადამიანი ხელისუფლების სათავეში მოდის, არაფორმალური ურთიერთობები ფორმალურში გადადის. წყდება ხალხს და ამით მათ აღიზიანებს.
- ხალხთან ხელისუფალის დაშორების მიზეზი მხოლოდ ფორმალურ ურთიერთობებზე გადასვლაა?
- ზოგჯერ ხელისუფალს ხალხთან ურთიერთობებისათვის დრო აღარ რჩება, საქმეები უგროვდება, მაგრამ მთავარი ეს არაა. მას ხალხისგან თანამდებობის პირისათვის განსაზღვრული ეტიკეტიც აშორებს. ჩინოსნებთან მისვლა გარკვეული ბარიერების გავლით ხდება და მკაცრად რეგლამენტირებულია. ასეთი ბარიერები ურთიერთობებს ამახინჯებს.
სხვა ადამიანის დამონება, ან სხვის მონად ქცევა ადამიანის თვისებაა. თითქმის ყველა ფორმაცია ამ პრინციპით იყო აგებული. სამწუხაროდ, დასაბამიდან დღემდე, ადამიანთა ცხოვრებას Sალა განსაზღვრავს. სახელმწიფო, ხელისუფლება და, აქედან გამომდინარე, ცალკეული პიროვნებები, ყოველთვის ამ პრინციპით მოქმედებდნენ, თუ ქვეყანაში ე.წ. თავისუფლება ძალადობით მყარდება, ესეც არ ნიშნავს ჭეშმარიტ თავისუფლებას. ჭეშმარიტი თავისუფლება ფსიქიკურ სიჯანსაღესთან არის დაკავშირებული. ძალადობას წესიერებისკენ ზოგადი გაგებით მივყავართ, სინამდვილეში კი - ასე არაა. ზოგიერთი ქართველი ახლაც სტალინს და მის დიქტატორობას მისტირის. როცა ქვეყნის ცხოვრებაში რაიმე სირთულე იქმნება, მას იხსენებს. ამბობს, სტალინი ცოცხალი რომ იყოს, აუცილებლად გვიშველიდაო. ადამიანთა გარკვეული ნაწილის ამგვარი საუბრის მიზეზი სტალინის სიცოცხლეში მის მიერ დამკვიდრებული ძალადობაა. მან ხალხს ისეთი ძალა აგრძნობინა, სიკვდილის შემდგომაც ემონებიან. ჩვენი ქვეყნის ცხოვრებაში ბევრი ხელმძღვანელი პიროვნება იყო გაფეტიშებული. სინამდვილეში, მათი დაკარგვით, ხალხს დამმონებელი დააკლდა და არა-ქვეყნისა და ხალხის აღმაშენებელი.
- რატომ ხდება, რომ ადამიანი ან სხვას იმონებს, ან თავად ემონება. ურთიერთობის შუალედური ფორმა არ არსებობს?
- ხშირად ამბობენ, მე რომ პრეზიდენტი ვიყო, ან მე რომ მინისტრი ვიყო, ამას და ამას გავაკეთებდიო. სინამდვილეში, მათ ეს თანამდებობა რომ მისცე, იგივეს გააკეთებენ, რასაც-მათი კრიტიკის ობიექტი.
როცა ხალხს ეკითხებიან, რა თვისებებს უნდა ფლობდეს ქვეყნის პირველი პირი, სხვადასხვა კრიტერიუმს ასახელებს - განათლებას, ნიჭიერებას, გარეგნობას... ფილოსოფოსი კონფუცი ამბობდა, რომ მხოლოდ ზნეობრივად ამაღლებულ ადამიანს აქვს უფლება, ერს წარუძღვესო. პლატონის თქმით კი, იგი ბრძენი უნდა იყოს. სინამდვილეში როგორი პიროვნება ხდება წინამძღოლი, მეცნიერებმა მაიმუნებზე ჩაატარეს მეტად საინტერესო ექსპერიმენტი.
რამდენიმე მაიმუნი ერთად მოათავსეს და ცხოვრების გარკვეული პირობები შეუქმნეს. გარკვეული პერიოდის შემდეგ, მათ შორის ურთიერთობები გამოიკვეთა. ზოგი უფროსობდა, ზოგიც მას ემორჩილებოდა. მეცნიერებს აინტერესებდათ, ვინ მოიპოვებდა ლიდერობას. ერთხელ მათ მცირედი საჭმელი მიუტანეს. წინასწარი ვარაუდით, ლიდერი ფიზიკურად ძლიერი ან ყველაზე ჭკვიანი უნდა გამხდარიყო, მაგრამ ამგვარმა წინასწარმეტყველებამ არ გაამართლა. ძალაუფლება ვერც ჭკვიანმა ჩაიგდო ხელში და ვერც ფიზიკურად ძლიერმა. მაიმუნების წინამძღოლი ყველაზე აგრესიული მაიმუნი გახდა. აქედან მეცნიერებმა დაასკვნეს, რომ ურთიერთობები ხშირად მართლაც ძალადობაზეა დამყარებული. შეიძლება ფიზიკურად ძლიერი იყოს, მაგრამ თუ მასში აგრესიაც არაა, ძალას ბოლომდე ვერ გამოიყენებს და გამარჯვებასაც ვერ მოიპოვებს.
პოლიტიკაში აგრესია ძალადობით ვლინდება. აგრესიული იპყრობს პოლიტიკურ ძალაუფლებას და მასებზე ახდენს გავლენას. აქედან გამომდინარე, ხალხი მისადმი მორჩილი ხდება. გარკვეულწილად, ხალხს მისი შიშიც უჩნდება.
- აგრესია მხოლოდ ზოგიერთ ადამიანშია?
- თავისებური აგრესია ყველას აქვს. მისგან განმუხტვა მაშინ ხდება, როცა იგი სხვას უყვირის, იმორჩილებს, სცემს, რაღაცას ამტვრევს, ეჩხუბება. ეს უკეთ მაშინ გამოსდის, როცა მის ხელში გარკვეული უფლებებიცაა. გარეთ გატანილი აგრესია სხვაზე გადადის, თვითონ კი თავს მშვიდად გრძნობს. ვისაც არა აქვს ძალაუფლება და საშუალება, რომ აგრესია გარეთ გაიტანოს, მას ორგანიზმში იტრიალებს, დეპრესიაში ვარდება, გადაწყვეტილების მიღება უჭირს, არასრულფასოვნების განცდა სტანჯავს და იძულებული ხდება, ვიღაცას დაემონოს.
- არჩევნების შემდეგ ხალხს თავისი არჩევანი აღარ მოსწონს. ამბობს, რომ მოტყუვდა. რატომ ტყუვდება ხალხი, ან რატომ ირჩევს აგრესიულ ლიდერს?
- ზოგი ასეთ ადამიანს ენერგიულს ეძახის და მისი ტემპერამენტი მოსწონს. ამბობს, - მუხლჩაუხრელია, დღე და ღამე შრომობსო. არადა, ყველა პიროვნებისთვის, მით უფრო ხელისუფლების პირველი პირისთვის, თავისუფალი, საფიქრალი დრო აუცილებელია. მან ფიქრით უნდა გადაწყვიტოს ქვეყნის სტრატეგია და ბედი. თანაც ჯანსაღი ფიქრები სერიოზული ფიქრის დროს ჩნდება. ვინც ფიქრს არ გაურბის, შეიძლება ითქვას, იგი ფსიქიკურად ჯანმრთელი ადამიანია.
ხშირად ადამიანებს ავიწყდებათ წინა ხელისუფალის შეცდომა, ან როცა პიროვნებებს მეორედ და მესამედ ენდობიან და პირველ პირებად კვლავ ირჩევენ, უნდათ, დაივიწყონ, რაც მათ გააკეთეს და იჯერებენ, რომ ამჯერად, აუცილებლად აასრულებს თავის ნათქვამს და ხალხზე იზრუნებს.
როცა შევარდნაძე საქართველოში ჩამოვიდა, ხალხი მის „ამაგს“ იმითაც აფასებდა, რომ უცხოეთში წასვლას, ბედნიერი ცხოვრების მოწყობასა და დასვენებას გაჭირვებულ საქართველოში ჩამოსვლა არჩია, მაგრამ ხალხი მოტყუვდა.
პოლიტიკიდან წასვლის შემდეგ ყველა აღნიშნავს, რომ შევარდნაძე ძალიან მოტყდა. ამის მიზეზი მისი ასაკიცაა, მაგრამ მთავარი მაინც სხვაა. ხელისუფლებაში ყოფნისას მას ჰქონდა იმის პირობა, რომ აგრესია გარეთ გამოეტანა, მაგრამ, რაც ეს სამსახური დაათმობინეს, აგრესიას შიგნით იგროვებს და, როგორც ჩანს, ამიტომაც ავადმყოფობს, რაც გარეგნობაზეც შეეტყო.
- მიხეილ სააკაშვილიც აგრესიული ხელისუფალია?
- იგი ყოველთვის აგრესიული იყო, მაგრამ ამჟამად მას მეტი უფლებები აქვს და მეტ აგრესიასაც ავლენს. მეტი აგრესია გამოაქვს გარეთ, რაც მის ჯანმრთელობას გარეგნულად ნამდვილად ეტყობა - ჯანმრთელად გამოიყურება. ასეა ნებისმიერი პოლიტიკოსი. ყველა მათგანი აგრესიას თავისებურად ავლენს. ზოგი პატარა მასაზე ძალადობს, ზოგიც - უფრო დიდზე. ხელისუფლებაში ის ოპოზიციონერებიც რომ მოვიდნენ, რომლებიც ჩინოვნიკებს მკაცრად აკრიტიკებენ, იმავეს გააკეთებენ და ხალხი კვლავ მოტყუებული დარჩება. ეს წრიული პროცესი იქამდე გამეორდება, სანამ ადამიანები ფსიქიურად არ გაჯანსაღდებიან.
ნანა დავითაშვილი
გაზეთ „P.S.“-ის არქივიდან, №37(341) 17-23 ოქტომბერი, 2005 წელი