გუშინ მოსულმა თოვლმა ქუთაისის ქუჩებში პრობლემები შექმნა. გაუწმენდავი ბორდიურებისა და გზის სავალი ნაწილის გამო მოსახლეობის დიდ ნაწილს გადაადგილება უჭირს. საქალაქო ტრანსპორტის მძღოლები და რიგითი გამვლელები ქუჩებს თოვლისგან საკუთარი ძალებით წმენდენ.
თოვლისგან გაუწმენდავია ცენტრალური მოედნის დიდი ნაწილი, სადაც ასევე შეფერხებებით გადადგილდება ტრანსპორტი. ტექნიკის მცირე ნაწილი, რომელიც ცენტრალურ მოედანზე გაწმენდით სამუშაოებს ახორციელებს, გზის სავალი ნაწილის გასასუფთავებლად საკმარისი არ არის.
ტექნიკის სიმცირეზე საუბრობს ქალაქის მერის მოვალეობის შემსრულებელი შოთა მურღულიაც. მისი თქმით, დამატებით დახმარებას ქალაქი ცენტრალური ხელისუფლებისგან იღებს.
მიუხედავად ამისა, ქალაქში თოვლისგან გაუწმენდავი ქუჩები მოსახლეობისთვის კვლავ მნიშვნელოვან დაბრკოლებას წარმოადგენს.