ქუთაისის ბალანჩივაძეების სახელობის ოპერისა და ბალეტის თეატრის მმართველი ხატია ვედმედევა ქუთაისელი ბიზნესმენის, სერგო ჩივაძის ცემასთან კავშირს უარყოფს.

ვედმედევას განცხადებით, მას მომხდარ დაპირისპირებასთან არანაირი კავშირი არ აქვს, ცილისწამებისთვის კი აპირებს ჩივაძეს სასამართლოში უჩივლოს.

„სამწუხაროა, რომ დღეს ამ ფაქტზე მიწევს კომენტარის გაკეთება, არანაირი კავშირი არ მაქვს მომხდართან, ტელეკომპანია „ქუთაისის“ დამფუძნებელთან მხოლოდ საქმიანი ურთიერთობა მაქვს, სერგო ჩივაძე კი მხოლოდ ერთხელ მინახავს. მე მივიღე ძალიან დიდ მორალური ზარალი, ამიტომ ვაპირებ, სერგო ჩივაძესთან სასამართლო დავაში შევიდე და ცილისწამებისთვის მისი  პასუხისგებაში მიცემა მოვითხოვო“-აღნიშნა ხატია ვედმედევამ.

შეგახსენებთ, რომ საინფორმაციო სააგენტო „ქუთაისითუდეის“ მფლობელმა სერგო ჩივაძემ გაავრცელა ინფორმაცია, რომ ახლადდაფუძნებული ტელეკომპანია „ქუთაისის“ ერთ-ერთმა მფლობელმა შოთა ჩიქოვანმა მას ფიზიკური და სიტყვიერი შეურაცხყოფა მიაყენა. ჩივაძის განცხადებით, ინციდენტი გვიან ღამით, ქალაქის ცენტრში მდებარე კაფე „ჯაზარტეს“ მიმდებარე ტერიტორიაზე მოხდა, ჩივაძისავე განცხადებით, მასზე თავდასხმა ქუთაისის საოპერო თეატრის გენარალური დირექტორის , ხატია ვედმედევას სახელს უკავშირდება.

როგორც ჩივაძე აცხადებს,  "ქუთაისითუდეი" შეეცადა, მოეპოვებინა ინფორმაცია ბალანჩივაძეების თეატრის ფინანსური მდგომარეობის და ახლადდანიშნული გენერალური დირექტორის სამომავლო გეგმებთან დაკავშირებით. მისივე ვარაუდით, ხატია ვედმედევას განსაკუთრებული გაღიზიანება ქუთაისის საოპერო თეატრში არსებული ფინანსური დარღვევების შესაძლო გამოაშკარავებამ გამოიწვია.

მომხდართან დაგავშირებით ტელეკომპანია "ქუთაისის" მფლობელი შოთა ჩიქოვანი კომენტარს არ აკეთებს.  ჩიქოვანი ჩივაძეს პროვოკატორად მოიხსენიებს და აღნიშნავს, რომ პროვოკატორის ბრალდებაზე კომენტარს არ გააკეთებს.