18 სექტემბერს კლუბ-რესტორან „ბერმუხაში“ სტუდია „ბალადის“ პირველი ალბომის პრეზენტაცია იმით გახლდათ განსხვავებული, რომ მისი ავტორი უსინათლოა. ხვიჩა სიმონიასთვის ეს პირველი ალბომია, რომელშიც სხვადასხვა ჟანრისა და სტილის 15 სიმღერაა შესული და ყველა ასაკის მსმენელისთვის განკუთვნილი.
ხვიჩა თვლის, რომ თხზვა სიამოვნებაა, შეთხზულის დაბეჭდვა - პასუხისმგებლობა. ზუსტად ამ ნიშნით გამოირჩევა ეს შემოქმედებითად დახუნძლული ადამიანიც, რომელიც ჯოჯოხეთურად შრომობს და თავს არ ზოგავს იმისათვის, რომ საქმე ბოლომდე მიიყვანოს. ალბომზე მუშაობაც ფრიად შრომატევადი, მაგრამ საინტერესო აღმოჩნდა მისთვის.
„დისკზე 4 თვე ვმუშაობდით, ძალიან ბევრი მუსიკოსი იყო ჩართული. არავინ დაგვხმარებია, ჩვენი მომღერლების ძალებით გაკეთდა ყველაფერი. აქ არის როგორც ბალადები, ასევე, როკი, რეპი, პაპსა... ყველა სიმღერა ძალიან მიყვარს, მაგრამ ყველაზე მეტად მაინც „ბრმათა ქალაქს“ გამოვარჩევდი, რომელიც ჩემს მდგომარეობას შეეხება. ტექსტის და მუსიკის ავტორიც მე ვარ“, - გაგვანდო ხვიჩა სიმონიამ.
იგი შეეცადა, მუსიკით გადმოეცა, რაც მის სულში ხდება: „ეს რომ სიტყვებით ყოფილიყო შესაძლებელი, მუსიკა არც იარსებებდა“. მის სიმღერებში სწორედ ის სიტყვებია, რაც ბოლომდე არ ითქმის. ისინი, ძირითადად, იმ სულიერ სიცარიელეზე, უმოქმედობაზე, უსიყვარულობაზე მოგვითხრობენ, რაც, როგორც გასულ, ისე ახლანდელ საუკუნეში ერთ-ერთი უდიდესი პრობლემაა.
„საუკუნე 20“, „შავთვალა“, „ლამაზი წუთები“, „სევდის ქალს“, „იწვიმებს ისევ“, „ყინულის ქალაქი“, „არემარე“... - ეს იმ სიმღერების ჩამონათვალია, რომელთა უმეტესობა სევდაშია ჩაფლული და რომლებსაც მუსიკოს-შემსრულებელი თემურ ხითარიშვილი და მომღერალი მადონა ტყაბლაძე ასრულებდნენ. რამდენიმე სიმღერა ხვიჩა სიმონიამ თავადაც შეასრულა.
„საკმაოდ საინტერესო იყო მასთან მუშაობა, ძალიან ნიჭიერი ადამიანია, ყოველთვის უყვარს რეპერტუარში სიახლეების შეტანა. სხვათაშორის, დღემდე მხოლოდ როკს მღეროდა და ერთობლივი ძალებით უკვე გავედით პოპზე, რეპ-როკსა და პოპ-როკზეც. ყოველთვის მძიმე მუსიკას მღეროდა და თვითონ მოინდომა სიახლის შეტანა რეპერტუარში, უფრო თავისუფალი რომ ყოფილიყო და ხალხისთვის არ ყოფილიყო დამამძიმებელი. რეპერტუარში გვაქვს სიმღერები დღევანდელ ცხოვრებაზე, სიყვარულზე, ახალგაზრდობაზე... ვმუშაობთ ყველანაირ სტილზე, ალბომი რომ ყველა თაობისთვის იყოს მოსასმენი“, - გვითხრა თემურ ხითარიშვილმა.
ხვიჩა სიმონიას არჩილ გოგბერაშვილთან ერთად საქველმოქმედო ორგანიზაციაც აქვს შექმნილი, რომელიც ცერებრალური დამბლით დაავადებულ ბავშვებს ეხმარება.
„ინვალიდთა დახმარებისა და დახელოვნების ლიგა გახლავთ ჩვენი ორგანიზაცია, ის დაფუძნდა 2005 წელს და ერთი წლის შემდეგ მიენიჭა საქველმოქმედო ორგანიზაციის სტატუსი. ჩვენი მთავარი საქმიანობაა, რომელ ქალაქშიც ჩატარდება საქველმოქმედო ღონისძიება თუ კონცერტი, იმ ქალაქში ცერებრალური დამბლით დაავადებულ ბავშვებს დავეხმაროთ. მე და ხვიჩა მსგავს საქმიანობას 1998 წლიდან ვეწეოდით, ოღონდ სხვა ორგანიზაციის სახელით. ქუთაისში ასეთი 35 ბავშვია დაფიქსირებული, რომელთაც სისტემატურად ვეხმარებით“, - აღნიშნა ორგანიზაცია „ინვალიდთა დახმარებისა და დახელოვნების ლიგის“ გამგეობის თავმჯდომარემ არჩილ გოგბერაშვილმა.
სამომავლოდ, საქართველოს მასშტაბით კიდევ არაერთი ქალაქის შემოვლას გეგმავენ.