გასულ კვირაში ქუთაისელი ემიგრანტი დედის, ჟურნალისტ ლელა თოლორდავას მიერ განათლების მინისტრის, მიხეილ ჩხენკელისათვის გაგზავნილმა ემოციურმა საჯარო წერილმა სრულიად სოციალური ქსელი და ინტერნეტმედია დაიპყრო. ის აცხადებს, რომ ქართველი დედების დიდი ნაწილის ემიგრაციაში ყოფნა დიდწილად საქართველოს განათლების სისტემაში არსებული პრობლემების, კორუფციისა და რეპეტიტორობის ინსტიტუტის შედეგია.
გთავაზობთ ნაწყვეტს ვრცელი ღია წერილიდან:
„ბატონო მინისტრო, ახლა აქ, იტალიის უკიდურეს სამხრეთში, ქალაქ რეჯო დი კალაბრიაში იტალიის დროით 14:07 საათია. ამ დროს არცერთი მოსწავლე არ არის სკოლაში, უკლებლივ ყველა მოსწავლე სახლშია, უკვე ნასადილები და დიდი ალბათობით დაძინებული, რადგან აქ 14:00-დან 16:00-მდე მკვდარი საათია... ამ დროს საქართველოში 17:07 საათია. ჩემი მონატრებული შვილი კი ჯერაც არ მისულა სახლში და იცით, რატომ?! იმიტომ, რომ გაკვეთილების დასრულების შემდეგ პირდაპირ მასწავლებელთან მიდის. ერთთან კი არა, სულ მცირე ოთხთან. სახლში რომ მიდის, კარგა ხნის დაღამებულია... ასეა მისი თითქმის ყველა თანაკლასელი, პარალელკლასელი, თანასკოლელი, თანაქალაქელი და ზოგადად საქართველოს საჯარო სკოლების თითქმის ყველა დამამთავრებელი (და არა მარტო) კლასების მოსწავლეები.
ჩემი შვილი მე-11 კლასის წარჩინებული მოსწავლეა, მაგრამ სკოლაში მიღებული ცოდნით შიშობს საატესტატო გამოცდების ღირსეულად ჩაბარებას. სწორედ ამან გამხადა იძულებული, გადმოვხვეწილიყავი უცხო ქვეყანაში, რათა შემძლებოდა კერძო მასწავლებლებთან სწავლის საფასურის გადახდა. და ეს საფასური არც ისე მცირედი თანხაა, ყოველ შემთხვევაში, რეგიონში მომუშავე ჟურნალისტის შემოსავალს ბევრად აღემატება. ერთი საგნის მომზადება საატესტატო გამოცდისთვის 500 ლარია, ოთხი ასეთი საგანი, ზედ დამატებული უცხო ენები და მათემატიკა, რომლის საფუძვლიანი ცოდნა სამომავლიდ გაგვიადვილებს უნარების სწავლას... თვეში 400 ლარი მარტო მეთერთმეტე კლასში მყოფ ჩემს შვილს, მეორე შვილიც მყავს და ის მე-9 კლასში სწავლობს, მასაც აქვს ორი გამოცდა და უთქმელადაც მიხვდებით, რომ ისიც ემზადება კერძო მასწავლებელთან. თითქმის 600 ლარი მჭირდება თვეში რომ პირნათელი ვიყო მასწავლებლებთან...
ბატონო მიხეილ, არ იფიქროთ პირად პრობლემაზე გაკარგვინებდეთ ძვირფას დროს.ეს პრობლემა დგას თითქმის ყველა ოჯახში, სადაც სკოლის მოსწავლეა. ამ პრობლემის გამო ძალიან ბევრმა დედამ დატოვა შვილები და გადმოიხვეწნენ საზღვარგარეთ. ვინც ვერ გაიღო შვილის მომავლისთვის ეს შეუფასებელი მსხვერპლი, თავში ხელებს იცემს და კრედიტებს იღებს ბანკებიდან იმის იმედად, რომ გამოჩნდება რაღაც. არიან ისეთებიც ვისთვისაც ეს თანხა პრობლემა არ არის და ამ თემაზე საუბარი უაზრობად მიაჩნია. თუმცა ასეთებს თავიანთი შვილები პრესტიჟულ ე.წ. ფასიან სკოლებში დაჰყავთ.
ბატონო მინისტრო, შორს ვარ იმ აზრისგან, რომ სკოლაში პროფესიონალი პედაგოგები არ გვყავდეს, გვყავს და არც ისე ცოტა. მაგრამ რა ხარისხით უნდა ასწავლოს მასწავლებელმა მოსწავლეებს, როცა იმის ფიქრითაა მოცული, როგორ იშოვოს საარსებო ფული. იმედია მოგეხსენებათ, რა სამარცხვინო გასამრჯელოც აქვათ საჯარო სკოლებში პედაგოგებს. რადგან სახელმწიფომ უყურადღებოდ დატოვა ის ხალხი, ვის ხელშიც არის ქვეყნის მომავალი, მათაც იპოვეს გზა და „საშინაო სკოლები“ გახსნეს. მეც ასე მოვიქცეოდი, პედაგოგი რომ ვიყო. მართალია ბავშვობაში მეგონა, რომ მასწავლებელი საჭმელს არ ჭამდა, მაგრამ ახლა ზუსტად ვიცი, რომ ისინი ჩვეულებრივი მოკვდავები არიან, მათაც იგივე პრობლემა უდგათ, როგორც ყველა დანარჩენს.
ბატონო მინისტრო, იმედია თქვენი განათლების და გამოცდილების პატრონს შეგწევთ ძალ-ღონე და გამბედაობა იმისა, რომ ძირეულად შეცვალოთ განათლების სფერო. თქვენს ადგილზე, აუცილებლად გააუქმებდი საატესტატო გამოცდებს იმ დრომდე, ვიდრე სკოლაში განათლების დონე არ აიწევდა. გავაუქმებდი უფუნქციო მე-12 კლასს, რამეთუ დამერწმუნეთ, არცერთი მეთერთმეტე კლასელი არ დადის სკოლაში, ყველანი რეპეტიტორებთან დადიან. იმ ხელფასს, რომელსაც სახელმწიფო გასცემს მეთერთმეტე კლასის სწავლებისთვის წყალში გადაყრილი თანხაა, არ მგონია, ისე მდიდარი იყოს ჩვენი ქვეყანა, გადასაყრელი ფული ჰქონდეს.
პირადად კორუფციული განათლების სფეროს მსხვერპლი მშობელი ვარ, საკუთარ პროფესიაზე უარი რომ მათქმევინა და უცხო ქვეყანაში ბადანტეობა მომისაჯა!!!
მინდა მჯეროდეს, რომ გულთან მიიტანთ ჩემს გულისტკივილს და დამეხმარებით სახლში დაბრუნებაში. გააუქმეთ საატესტატო გამოცდები და ამით ბევრ დედას დააბრუნებთ შვილებთან.
ბატონო მიხეილ, ჩემი სამშობლოში დაბრუნება თქვენს ხელშია!!!“
ჟურნალისტის ამ წერილს რამდენიმე დღეში გამოეხმაურა საქართველოს განათლების მინისტრი, ბატონი მიხეილ ჩხენკელი. მან პირადად ტელეფონზე დაურეკა ემიგრანტ დედას.
ამ სატელეფონო ზარის შემდეგ, ლელა თოლორდავამ უფრო იმედიანი წერილი გაავრცელა სოციალურ ქსელში, სადაც წერს:
მინისტრმა ნახევარ საათზე მეტი მესაუბრა, მითხრა, გავეცანი თქვენს ღია წერილს და ყველაფერში გეთანხმებითო. სამინისტროსძალიან ბევრი მუშაობა მოუწევს, სკოლა სასწავლო დაწესებულებას რომ დაამსგავსოსო. მესაუბრა პედაგოგების გადამზადებაზე, სასწავლო პროგრამებზე, სახელმძღვანელოების შეცვლაზე. უკვე მიმდინარეობს ამ საკითხებზემუშაობა და გპირდებით, ყველა სახელმძღვანელოს პირადად გავეცნობიო. რაც შეეხება სკოლებში გამეფებულ კორუფციას და ,,საშინაო სკოლებს'', სასწრაფო წესით მოხდება ამ ფაქტების გამოვლენა და შესაბამისი ზომებიიქნება მიღებულიო. დიახ, ბატობო მინისტრო, თქვენ ღირსება უნდა დაუბრუნოთ ქუთაისის პირველ საჯარო სკოლას, სკოლას, რომელმაც მეოცე საუკუნის გრანდები აღზარდა-მეთქი. ღირსება უნდა დაუბრუნოთ ყველა სკოლას , რომელიცკორუფციაშია ჩაფლული... თითქმის ყველა ე.წ. პრესტიჟული სკოლა ორმაგი სტანდარტებით ასწავლის-მეთქი.
გპირდებითო, ყველა ის კანონდარღვევა იქნება გამოვლენილი და შესაბამისი ღონისძიებები გატარდება. ჩემი მიზანიც ესააო...
***
ემიგრანტი დედისა და მინისტრის საჯარო საუბრებს ჯერჯერობით ის შედეგი მოჰყვა, რომ საზოგადოების ერთმა ნაწილმა მოიწონა ლელა თოლორდავას გამბედაობა, ხოლო მეორე ნაწილმა ძალიან ბევრი ტალახი ესროლა ლელას და მის შვილებს.
სამინისტროდან რეაგირება კი ჯერჯერობით მხოლოდ ის იყო, რომ ქუთაისის პირველ საჯარო სკოლაში აუდიტი შევიდა შესამოწმებლად და იმავე დღეს უკანვე კმაყოფილი გამოვიდა, არანაირ დარღვევას ადგილი არა აქვსო. ამ ფაქტთან დაკავშირებით ქუთაისის რესურსცენტრის ხელმძღვანელმა ბადრი ვაშაკიძემ მედიას განუცხადა, რომ აუდიტის შესვლა პირველ სკოლაში სწორედ მშობლის წერილს უკავშირდებოდა, ხოლო თავად განათლების სამინისტროს პრესსამსახურმა გაავრცელა ინფორმაცია, რომ ეს გეგმიური შემოწმება იყო და არანარ წერილთან კავშირი არ ჰქონდა.
ნანა გულბანი